Non hai rival para o Baxi Ferrol. Polo menos na Liga Feminina 2, na que lidera desde a primeira xornada e na que buscará a súa décima vitoria consecutiva esta fin de semana. O sábado, 5 de decembro, recibe ao GDKO Ibaizabal en A Malata, nun duelo que se celebrará ás 17:00 horas.
As ferrolás veñen de gañar partido tras partido. A maioría deles por unha ampla diferenza respecto a rivais que non puideron aguantar o seu ritmo nin atoparon a fórmula para frealas. Pero o Osés Construciones Fundación Navarra Baloncesto Ardoi, case atopou algunhas grietas no conxunto dirixido por Lino López.
Os erros en defensa e un baixo acerto en ataque fixeron que os primeiro minutos foran do cadro local. Con todo, as ferrolás remontaron e leváronse o encontro por unha diferenza de 10 puntos, a menor no que vai de tempada.
O rival desta décima xornada pasará tamén aputos para tentar impoñerse ás líderes da categoría. As vascas do GDKO Ibaizabal chegan dunha derrota, tamén cunha diferenza de 10 puntos, contra o Extremadura Miralvalle Plasencia. Un duelo que loitaron na primeira parte pero escapóuselles das mans na segunda. Con cinco vitorias e tres derrotas (e un partido menos que o Baxi), o equipo visitante ocupa a sexta posición con 13 puntos.
O rival do Baxi, pendente dun cambio no banquillo
Ademais, o conxunto enfróntase a outro reto na tempada: o cambio do seu corpo técnico. Segundo informan na súa web, o club está a traballar desde o pasado domingo na procura dun novo adestrador tras a marcha de Josema Alcantara. Mentres tanto, Ibon López De Letona será o encargado de dar as ordes ao Ibaizabal, club do que formou parte nos seus inicios no baloncesto.
Letona é actualmente o adestrador do equipo junior masculino da Fundación Bilbao Basket e o segundo técnico do cadro de Primera División Nacional masculina do mesmo club, polo que accedeu a ocupar esta nova posición temporalmente.
Cinco puntos por riba do GDKO están as xogadoras de Lino López. Con dúas baloncestistas no top 5 das xogadoras mellor valoradas (Jenna Linn Allen na primeira posición e Irene Gari na quinta) e entre as dez máximas anotadoras (de novo, Allen e Gari), o cadro de Ferrol chega forte ao encontro.
Unha media valorativa de 108,6 puntos, cunha moi ampla diferenza respecto aos demais equipos, fai que non pareza probable que o Baxi Ferrol solte a posición de líder da LF2. O partido, disputado en A Malata, retransmitirase en directo polo Canal Feb.
🔜Este sábado nos enfrentamos a nuestro próximo reto…
🏀BAXI Ferrol – @IbaizabalST
📍Sábado 5 de diciembre
⛹️♀️Pabellón municipal de A Malata
⏱17.00 horas
Partido retransmitido por https://t.co/1rWK50IUXc#BAXIFerrol #LF2 pic.twitter.com/bR4VjQ3dDd— Baxi Ferrol (@UniFerrol) December 3, 2020
