A sexta xornada do grupo polo título de Liga Guerreras enfronta ás galegas do Atlético Guardés co Rocasa Gran Canaria. Este será o segundo encontro seguido para as canarias coas galegas, despois do disputado o 28 de abril. A nova cita será o sábado, 8 de maio, ás 19:00 horas nunha Sangriña aberta ao público.
Tras o aprazamento do choque entre o conxunto do Rocasa Gran Canaria e o Rincón Fertilidad Málaga, debido á final da EHF European Cup para as andaluzas, e o cambio da segunda xornada entre o Guardés e as canarias, o destino quixo que as de Carlos Herrera xogasen de maneira seguida contra as de José Ignacio Prades.
O último sprint do Atlético Guardés
O Atlético Guardés mantense como segundo clasificado, pero debe meter unha marcha máis para aguantar o último sprint da tempada. O seu adestrador, José I. Prades, asegura que o grupo traballa para “aguantar esa chispa e alongala catro semanas máis para poder competir coa máxima ilusión no que nos queda”.
O partido deste sábado será unha loita en toda regra por acadar a posición de prata. O conxunto do Super Amara Bera Bera é practicamente campión da liga deste curso. Debaixo delas está o Balonmán Atlético Guardés, con 15 puntos e unha vitoria contra o Rocasa Gran Canaria pola mínima, e como terceiras están as propias canarias, con 13 puntos e un partido aínda pendente.
A igualdade será máxima no Inferno da Sangriña, polo que o adestrador das galegas agarda un encontro “súper esixente, tamén a nivel táctico, xa que teremos que entender moi ben como queremos defendelas”.
José I. Prades: “Será un partido súper esixente, tamén a nivel táctico, xa que teremos que entender moi ben como queremos defendelas”
O cadro local buscará repetir as sensacións que o levaron á vitoria no anterior enfrontamento ante as canarias en Telde, cunha vitoria por un 26-27. Con moito en xogo, o técnico das galegas, José Ignacio Prades, prevé “un partido super difícil, xa que ambos nos xogamos moito”.
Con todo, desde o banco do Atlético Guardés o adestrador móstrase confiado. “Fixeron os deberes cando tocaba e cargamos pilas e gasolina cando era necesario e agora só hai que manter o estado de forma”, apunta o técnico das galegas
O adestrador rival, Carlos Herrera, eloxia ao equipo galego
Neste mes de maio remata a tempada 2021/2022. Antes diso, as xogadoras do Baixo Miño aínda teñen que visitar ao KH-7 Granollers, a fase final da Copa da Raíña, e a última xornada ante o Liberbank Gijón.
O propio Rocasa Gran Canaria será o anfitrión da competición copeira, e en liga tamén loita co obxectivo de meterse en Europa.
O BM Atlético Guardés recolle as declaracións de Carlos Herrera para o club canario, nas que o técnico explica que “este é un partido moi importante ante un gran equipo. O Guardés está facendo un temporadón e cada día xoga mellor. Nós estamos adestrando ben para ir a Galicia a sacar dous puntos que nos axuden a asentarnos na parte alta da táboa. Temos que conseguir a a praza para Europa o antes posible”.
Carlos Herrera, adestrador do conxunto do Rocasa Gran Canaria: “O Guardés está facendo un temporadón e cada día xoga mellor”
Xogar como local na pista da Sangriña será outro punto a favor para as galegas. O adestrador rival admite que “o pavillón é un dos sitios onde mellor se vive o balonmán. É un dos sitios onde hai un gran ambiente, xa que teñen un gran grupo de xente marabillosa que anima ao seu equipo durante todo o partido”. Por algo lle chaman á cancha do Guardés O Inferno da Sangriña.
