O Mecalia Atlético Guardés deixa atrás unha mala pretempada para dar comezo a unha nova campaña con bo pé. Nun partido case perfecto, as xogadoras de José I. Prades venceron ao Caja Rural Aula Valladolid por un 26-30.
Cun alto nivel defensivo de otdo o bloque, a aportación de Carratú en portería e da apisoadora de Paula Arcos foi clave para a vitoria galega. As malas sensacións individuais e colectivas quedaron atrás para dar paso a un triunfo solvente, un liderado provisional e a impresión de que o equipo aínda ten marxe de mellora.
Quedaron sen poder xogar o partido por lesión Hannah Nunes, cunha escordadura de xeonllo e Tamires Anselmo, por precaución ao arrastrar unhas molestias na mesma articulación.
Comezo de 10 para o Guardés
Nos primeiros minutos, Daniela Moreno anotou o primeiro gol da Liga Guerreras Iberdrola 2021/2022. O tanto inaugurou un partido vibrante, de ritmo vertixinoso, acorde co balonmán esperable nun encontro entre rivais íntimos. En menos dun mes, esta era a súa terceira cita.
Os goles alternábanse en ambas porterías pero pronto o Guardés logrou escaparse no marcador. Cunha gran defensa, o 6:0 de Prades non decepcionou, axudando a Carratú a producir na portería. En ataque, o conxunto case non concedeu perdas, e tras cada lanzamento, o replegamento era rápido e preciso.
O equipo galego soubo desaxustar os contraataques das vallisoletanas, a súa principal arma. O club do Guardés foi quen de aumentar a súa vantaxe co paso dos minutos.
Paula Arcos, recentemente convocada coa Selección Española para os Xogos Olímpicos, foi a protagonista, sumando cinco tantos na primeira metade. Xunto a ela, Pessoa alternou penetracións e lanzamentos coa esquerda, mentres que María Sancha demostrou galóns de veterá malia estar debutando na máxima categoría.
Só as sete paradas de Lulú Guerra impediron unha vantaxe maior para as galegas, que foron ao descanso co 13-17. Tras o paso por vestiarios, o guion non mudou. As locais arrastraban as perdas de balón e as visitantes xogaban equilibradas en defensa e en ataque, para acadar un colchón de seis puntos no ecuador da segunda parte.
Con nada que perder, nos últimos minutos o Aula Valladolid loitou con todo. A falta de sete minutos para o final, a diferenza era de só tres puntos, pero Prades volveu a confiar no 6:0 para impoñerse en ataque, cunha sobresaínta Paula Arcos, asegurando a vitoria.
FICHA TÉCNICA
CAJA RURAL AULA VALLADOLID (13+13): Lulú Guerra (p.), Carmen Sanz (p.); Jimena Laguna (2), Claudia Álvarez, Inoa Lucio (1), Danila So (3), Cifuentes (4), Téllez (3), Malena Valles (7), Tere Álvarez, Sara Molés (1), Elena García, Cuadrado (1), Rafaela Bergara, Savina Bergara e Amaia González de Garibay (4).
ATLÉTICO GUARDÉS (17+13): Carratú (p.), Míriam Sempere (p.); Sandra Santiago, Nazaret Calzado, Lore Pérez (3), Ángela Nieto, Descalzo (3), Lima (3), Arcos (9), Carla Gómez (3), Sancha (1), Pessoa (5), Daniela Moreno (3), e Yaiza Alonso.
PARCIAIS CADA CINCO MINUTOS: 1-3, 3-7, 6-9, 10-12, 11-16, 13-17 (descanso); 16-20, 18-24, 20-26, 22-27, 25-28, 26-30 (final).
ARBITRAXE: Miquel Florenza e Jordi Ausas (Cataluña). Excluíron ás xogadoras locais Cifuentes (2), Cuadrado e Téllez e ás visitantes Descalzo (2), Carla Gómez, Lima e Pessoa.
INCIDENCIAS: Partido correspondente á primeira xornada da Liga Guerreras Iberdrola, disputado no pavillón Huerta del Rey de Valladolid.
