O Atlético Guardés despedirá en casa unha tempada emocionante na que, malia as dificultades, as galegas demostraron unha vez máis a súa capacidade de superación e a súa resiliencia. A última cita deste atípico curso será este sábado, 29 de maio, ás 19:00 horas en A Sangriña, co Liberbank Gijón como rival.
Nove meses despois do inicio da tempada 2020/2021 da Liga Guerreras Iberdrola, o conxunto do Baixo Miño despedirá ás pistas e á afección xogando en casa consagrado como o subcampión da competición, semifinalista da Copa e da EHF European Cup.
Partido de despedidas para o Guardés
O último partido, correspondente á xornada 8 do grupo polo título, xa non ten ningún tipo de aliciente para as de Prades, máis aló de brindarlle a última alegría á afección. De todas formas, a emoción si estará presente na pista da Sangriña. Este será o último enfrontamento coa camiseta do Guardés para xogadoras como Paulina Pérez Buforn, Sarah Valero ou Rosario Urban, quenes pasarán a competir no balonmán francés.
Para esta despedida, o contrincante das xogadoras do Baixo Miño será o Liberbank Gijón, con Cristina Cabeza como adestradora. Asturianas e galegas víranse xa as caras dúas veces en pouco máis dun mes ao coincidir próximas no calendario a cuarta xornada de Liga e as semifinais da Copa da Raíña disputada en Telde. En ambos enfrontamentos, as galegas saíron victoriosas, cun 19-23 e un 30-24 respectivamente.
Agora, o Atlético Guardés busca o broche de ouro a unha tempada que deixou unha vez máis o sinsabor copeiro hai uns días. Este sábado haberá unha oportunidade magnífica para pechar outra campaña doce do equipo galego.
O encontro poderá seguirse vía streaming en directo no Youtube do Guardés.
