Logo de ir 11-14 ao descanso o Mecalia Atlético Guardés rematou por caer derrotado no Palau esta tarde diante do KH-7 BM Granollers. O resultado ao final do choque foi de 23-22. As galegas bloqueáronse en ataque e desperdiciaron a súa renda. Na clasificación, mantéñense cuartas. O equipo regresará mañá pola mañá a Galicia e terá descanso até o luns.
O Mecalia empezou a controlar o encontro a partir do minuto 10, pero de novo, os fallos de cara a portaría rival foron numerosos e terminaron por custarlles o partido ás galegas. Tras dous empates consecutivos en Liga (contra Bera Bera e Elche), as xogadoras que adestra Prades vanse de baleiro nun partido no que comezaron a remolque, sobrepuxéronse a un mal inicio e volveron a tornase pequenas en lanzamento.
O Guardés empregouse a fondo para controlar a Gassama en 6 metros, pero Lepère e Vegué anotaban desde oito metros e á contra respectivamente. O Granollers conseguía así as súas primeiras rendas de dous goles e mantiña desde o inicio a súa vantaxe no electrónico.
O Guardés tamén era capaz de correr e con Sempere atenta ao rexeite e Campos veloz á contra asinaban un parcial de 0-2 para devolver a igualdade ao partido (Min. 10, 5-5).
Carla Gómez foi excluída por unha acción sobre o pivote Gassama, pero o Guardés mantivo o control na inferioridade (Min.12:30, 5-5). Robert Cuesta mandou adiantar a defensa, pero as galegas atoparon oco sen problemas para conseguir a súa primeira vantaxe e mantela en varios parciais (Min. 14, 5-6, 6-7, 8-9…) á vez que Prades facía as súas primeiras rotacións (Mazza por Santiago e Bravo por Urban). Vegué igualou desde sete metros e o seguinte gol guardés chegou cando Lorena Pérez cortou un pase a Ana González, atopou a Campos e Sempere sentenciou á contra (7-8).
O intercambio de goles foi a tónica destes minutos, pero o Guardés desperdiciou até dous ataques con opcións de levar a súa renda ao máis dous.
Carratú e Wiggins atallaban balóns de cando en vez e o Mecalia Atlético Guardés seguía estrelándose contra o poste. No banco local, Cuesta daba descanso a Gassama e daba minutos á viguesa Carmen Prelchi. Primeiro balón, primeiro gol para a galega desde seis metros para colocar o 9-9.
Martina Mazza e Sempere eran as encargadas de tirar do carro, pero nas locais Lepère e Torras elevábanse desde nove metros ou se coaban entre a defensa para cortar a renda galega (Min. 25:30, 11-11). Pérez recuperou o 11-12, pero Prades aproveitou para parar o partido e dar indicacións para o final da primeira parte. Con éxito, porque Mazza, moi acertada, colocou o 11-13. Iso si, no seu seguinte lanzamento Nicole Wiggins detivo o balón. Bravo, na última acción da primeira parte elevouse desde o extremo e pechou o acto co 11-14. Ese tanteo constituía a máxima renda até ese momento do encontro.
Na segunda metade, o Guardés viviu unha seca anotadora
Tras o paso por vestiarios, Guareiro puxo ao Granollers a dous, pero Bravo, rapidísima, anotou dous tantos seguidos para manter as distancias (14-16). A zona central da defensa guardesa era incapaz de frear a Guareiro e a brasileira explotaba a súa superioridade para anotar catro goles en cinco minutos.
Tras o 15-18, as locais colleitaron un 4-1 de parcial para porse a un (18-19), pero o Guardés seguiu ao seu uns cuantos minutos máis. Anotou Bravo, fixo o mesmo Sempere e de novo un colchón cómodo (Min. 40, 18-21).
Foi un espellismo, xa que o Mecalia Atlético Guardés iniciou un novo desfalecemento con dez minutos e medio sen anotar, unha seca que prolongou Wiggins coas súas paradas e que contrarrestou Carratú con varias accións (Min. 47, 20-21), aínda que a porteira arxentina non puido impedir que Ana González desde o extremo igualase o partido (Min.48, 21-21).
Á portuguesa Patricia Lima non lle tremeu o brazo e rompeu a seca guardesa (21-22), pero na seguinte acción Santiago lanzaba moi desviada. Quedaban oito minutos para o final e Cuesta tamén pedía tempo morto (51:54) como fixera Prades sete minutos antes. Saíu Meriem Ezbida para deter un lanzamento de sete metros a Vegué, pero o rexeite resultou imparable (22-22). Wiggins si que era un muro e mantiña ao Guardés nun pobre rexistro dun gol en quince minutos.
Volveu González á liña de sete metros para anotar ante Carratú (23-22) e pór ao Granollers por diante, algo que conseguiran por última vez no minuto oito. Prades pediu o seu terceiro tempo morto para afrontar os últimos 4 minutos do partido (Descalzo, excluída).
Buforn non conseguiu anotar, tampouco Bravo quen levou a súa rosca ao corpo de Nicole Wiggins. O Granollers perdeu o balón e sobre pasivo Pérez lanzou fóra. Aínda tivo outro intento Santiago, pero a defensa local blocó o lanzamento. Para alargar o desenlace, Cuesta parou o partido a 51 segundos do final pero o resultado xa se mantivo invariable: 23-22 para as locais.
FICHA TÉCNICA
KH-7 BM GRANOLLERS (11+12): Wiggins, Imane Ben, Kaba Gassama, Ona Vila, Elene Vázquez, Mireia Torras (3), Lora Sarandeva (2), Lepère (4), Giulia Guareiro (6), Ona Vegué (5), Carmen Prelchi (1), Marta Mera, Ana González (2), Gabriela Romero e Ana Monteiro.
MECALIA ATLÉTICO GUARDÉS (14-8): Meriem Ezbida, África Sempere (5), Sandra Marqués, Martina Mazza (4), Carmen Campos (5), Lorena Pérez (1), Sara Bravo (4), Estefanía Descalzo, Paulina Pérez (2), Patrícia Lima (1), Cristina Barbosa, Rosario Urban, Carla Gómez e Marisol Carratú.
MARCADOR CADA 5 MINUTOS: 2-2, 5-4, 6-7, 8-9, 11-11, 11-14 (descanso), 15-18, 18-21, 20-21, 21-22, 22-22, 23-22 (final).
ÁRBITROS: Alberto Macías de Paz E Ernesto Ruiz Vergara (Andalucía). Excluíron por parte das visitantes a Gómez e Descalzo (2).
INCIDENCIAS:Partido correspondiente á xornada 13 da Liga Guerreras Iberdrola disputado no Palau d’Esports de Granollers diante duns 300 espectadores.
Atentas ao sorteo da Challenge Cup
O sorteo dos cuartos de final da Challenge Cup celebrarase o martes 11 de febreiro en Viena. Neses bombos xa ten confirmada a súa presenza o Mecalia Atlético Guardés, quen agora espera impaciente por rival.
A eliminatoria decidirase a ida e volta os seguintes fins de semana: 29.02-01.03 e 07.03-08.03. Este calendario obrigou xa ás galegas a pedir o cambio de horario do partido contra o Rocasa Gran Canaria, proposto para o mércores 26.02 ao 20 horario insular.
Na axenda competitiva inmediata: a Copa
O Mecalia Atlético Guardés ten como seguinte compromiso competitivo que afrontar o partido da volta da Copa da Raíña. O encontro vaise xogar o sábado 15 de febreiro ás 18:00 horas na Sangriña. O rival será, nesta ocasión, o Balonmano Salud Tenerife. Na ida o encontro finalizou cun tanteo de: 26-27. Está previsto que o partido o arbitren Alejandro Hoz e Axel Riloba.
As galegas da Guarda e as tinerfeñas do barrio de La Salud, teñen en xogo estar na fase final do torneo copeiro (24-26 de abril, Alhaurín de la Torre).
