O concelleiro de Educación, Jesús Celemín, estivo no pantalán de Oza acompañando aos participantes da primeira xornada do programa ‘O Atlántico parte de ti’, promovido polo Concello da Coruña a través do Servizo Municipal de Deportes e a Concellaría de Educación. Esta iniciativa contará nesta segunda edición coa participación de 16 centros educativos da cidade.
‘O Atlántico parte de ti’ é un programa pensado para achegar o mundo da vela ás mozas e mozos de 5º e 6º de primaria dos colexios da cidade da Coruña. É unha proposta deportiva que busca fomentar a actividade física entre a mocidade. O obxectivo é que as persoas participantes adquiran as técnicas básicas da vela, ademais de coñecer e respectar as normas de seguridade e protección para o desenvolvemento de deportes acuáticos.
Catro clubs coruñeses colaboran con ‘O Atlántico parte de ti’
O proxecto ‘O Atlántico parte de ti’ conta coa colaboración de catro clubs da cidade: RC Náutico da Coruña, Marina Coruña, Club Marítimo de Oza e Playa de Oza, ademais da Federación Galega de Vela. Na primeira xornada participou o alumnado do CEIP Torre de Hércules. En total, serán 46 as aulas que tomen parte desta iniciativa e case un millar de nenos e nenas, o que supón case 250 participantes máis que na primeira edición.
Esta iniciativa do Concello da Coruña “é todo un éxito de participación e de interese entre os centros docentes e as/os escolares da cidade. A Coruña é unha cidade que vive por e para o mar”, sinalou Jesús Celemín. O concelleiro destacou tamén outro programa conxunto de Deportes e Educación, como é ‘Máis rápidas, máis altas, máis fortes’, que promove a participación e implicación da muller no ámbito deportivo.
O programa ‘O Atlántico parte de ti’ realizarase todos os mércores, xoves e venres de xaneiro a xuño. As persoas participantes poderán iniciarse en deportes como a vela ou o windsurf.
