O CB Arxil ten opcións para a permanencia, pero pende dun fío na LF2. Tres derrotas consecutivas as deixan na penúltima posición, só por riba do Magec Tías, o seu próximo rival. Galegas e canarias recuperan o encontro adiado da undécima xornada este venres, 19 de febreiro, ás 19:30 hora insular.
O encontro aprazouse na súa data orixinal (8 de decembro) por un falso positivo detectado nas filas das canarias. Entón, ambos equipos ocupaban as mesmas posicións que agora, e ambos estaban nun mal momento deportivo, sendo os equipos con máis partidos perdidos de maneira consecutiva.
Un par de meses despois, os dous conxuntos lograron sumar máis puntos, pero o Magec Tías nunca abandonou a última praza. Si o fixo o Arxil, que logrou subir ao décimo posto na 17ª xornada, para volver a baixar nas xornadas posteriores.
A meta do Arxil: rachar coa mala racha
O obxectivo do conxunto pontevedrés nesta semana é claro: rematar a racha de derrotas consecutivas para sumar puntos e escapar do pozo.
Nas últimas tres xornadas o Arxil non foi quen de puntuar, aínda que deixou destellos de bo xogo ante os tres rivais (Ibaizabal, Cortegada e Miralvalle). Porén, a irregularidade foi demasiado castigo, impedindo a vitoria.
As de Maite Méndez saben que para conseguir o tan necesario trunfo é vital manter o ritmo durante os corenta minutos. Pola súa parte, Lino Vázquez engade que gañar “daría tranquilidade”.
A adestradora poderá contar co seu plantel habitual, excepto con Samara, que na data orixinal do duelo non contaba con ficha no equipo galego.
No bando contrario, o Magec Tías é un club que está a sufrir moitas lesións esta tempada. Un exemplo é Yaiza García, que aínda non puido debutar coa camisola canaria.
Quenes si estarán previsiblemente son a veterana Regina Gómez, líder en anotación no conxunto local, a junior Maimouna Haidara, Carolina Mateo ou María Esperanza Delgado. Estas últimas cunha media anotadora superior aos 10 puntos por partido.
O encontro poderá visualizarse en directo no streaming do Canal FEB.
Dobre cita nas illas
Aproveitando o desprazamento, o Arxil xogará o domingo, 21 de febreiro, ás 12:00 horas contra o Vega Lagunera Adareva Tenerife. Este encontro está enmarcado na xornada 21ª, correspondente a esta fin de semana.
Este outro club canario será un rival moito máis duro. Cun empate de vitorias e derrotas, dez de cada unha, as de Tenerife son sétimas clasificadas, con seis puntos máis que as verdes.
