Cando a permanencia está en xogo cada vitoria vale dobre. Este é o caso do CB Arxil, que ven de vencer ao Azkoitia Azpeitia (73-67). Un trunfo que sube os ánimos das verdes, ao conseguilo ademais ante un dos mellores equipos da competición.
Sumados estes dous puntos, as pontevedresas ocupan a novena posición na LF2, empatadas co Maristas a 29 puntos e dous por riba da AD Cortegada, ADBA e Rosalía, e a tres do colista, o Magec Tías.
O esforzo do Arxil ten recompensa
Empezaron fortes as verdes en casa, presionando desde o minuto 1 e confiando no seu xogo. O primeiro parcial foi para o Arxil que marcaba un 4-0 que tivo contestación vasca. Para o minuto 6, o resultado xa daba mostra da igualdade na pista, cun 9-9.
Isto non amedrentou ás galegas, que mantiveron unha boa defensa. Esta, sumada ao acerto en ataque, valeulles para adquirir unha vantaxe de seis puntos, coa efectividade da destacada Sara Castro, autora dun triplo e dun robo nun contragolpe individual.
A falta de 90 segundos, o adestrador visitante viuse obrigado a solicitar un tempo morto para reorganizar ás súas e intentar salvar o primeiro cuarto. O Arxil vencía entón cun 17-11, unha superioridade que aumentaría ata chegar ao 21-16.
No segundo tempo, de novo Sara Castro foi a protagonista indiscutible. Apoiada por Forster en defensa, as galegas trunfaban na pista do CGTD. Desta forma, o Arxil lograban unha distancia de 15 puntos no ecuador do segundo cuarto.
As visitantes non se rendían e seguían loitando por chegar ao empate e así foron quen de reducir a diferenza no luminoso. Porén, o seu acerto seguía a ser inferior ao das verdes, polo que a pausa chegou co 43-33 no marcador, dando motivos para a celebración nas filas pontevedresas.
Afrontando con esperanzas a segunda metade
O partido non estaba decidido, pero o Arxil afrontaba a segunda metade coa confianza de saberse máis efectivas e en mellor forma que as rivais.
Porén, o Azpeitia conseguiu poñer en problemas ás galegas, presionando e provocando erros defensivos o que lle permitiu achegarse perigosamente ás locais. Co electrónico informando do 48-44, Maite Méndez solicitou unha pausa para dar instruccións ás súas.
As indicacións deron resultado e o Arxil volveu a aumentar a intensidade e recuperou o dominio do balón, aumentando o seu colchón respecto ás vascas. Para o tempo final, as pontevedresas vencían xa de dez puntos.
Os nervios e a presión de non fallar podían terlle pasado factura ás verdes no inicio do último cuarto, pero non foi así. Confiando no seu talento e xogo e con Sara Castro liderando en anotación, as de Méndez mantivéronse frías para amarrar a vitoria.
A efectividade de Carla Fernández e Masiá baixo o aro e Forster destacando en defensa permitían que o Arxil se mantivera á cabeza. Pola súa banda, o Azpeitia seguía confiando en poder remontar o partido e así o demostraba sobre a pista.
Nos minutos finais as vascas deron un golpe sobre a mesa que case fai cambalear ás galegas. Un contundente parcial 0-13 poñía ás locais contra as cordas, pero a distancia conseguida nos cuartos anteriores facía que seguisen por diante (70-67).
Ter o empate a un triplo de distancia foi moita tensión para o Azpeitia, que comezou a cometer erros e faltas. Forster e Castro foron as encargadas de materializar en puntos ditas faltas, deixando o marcador nun 73-67 final.
Sara Castro, MVP indiscutible
O xogo visto no CGTD tivo unha protagonista con nome e apelido: Sara Castro. A xogadora do club pontevedrés foi a máis destacada do partido, proclamándose con todos os méritos como a MVP con 31 créditos valorativos.
Grazas á súa gran actuación, con 28 puntos ás súas costas e un 75% de acerto desde a liña de tiro libre, o Arxil proclamouse campión.
Dálle ao play para revivir as mellores xogadas de Sara Castro para o Arxil.
FICHA TÉCNICA
73) CB ARXIL: Carla Fernández (10), Noelia Masía (11), Cristina Díaz-Pache (6), Heather Forster (10), Sara Castro (28) –quinteto inicial-. Tamén xogaron: Samra Omerbasic, Margarita Moreira e Natalia López (6).
67) AZKOITIA AZPEITIA ISB: Sara Iparraguirre (8), Saioa Altzga (7), Manuela Effa (8), Morgan Asha Green (20) y Crystal Primm (12) – quinteto inicial -. Tamén xogaron: María Otegi, Intza Lizarazu (8) e Alazne Lizundia(4).
PARCIAIS: 21-16, 22-17, 15-15 e 15-19
ÁRBITROS: Álvarez Rodríguez e Abalo Buceta.
INCIDENCIAS: Partido correspondente á 22ª xornada da LF2 disputado no polideportivo Centro Galego de Tecnificación Deportiva (CGTD) de Pontevedra.
