O CB Arxil aínda non ten asegurada a permanencia e por iso cada partido conta. Aínda máis se é ante un rival que tamén se xoga a salvación, como foi o caso na última xornada. As pontevedresas recibían en casa a un Magec Tías que loita por escalar postos e logrou unha vitoria en terra galega (55-80).
Con esta derrota, as verdes aínda deberán seguir pelexando por seguir un ano máis na LF2, aínda que teñan xa pé e medio na categoría de prata.
Un Arxil irregular na primeira parte
Xa os primeiros ataques do encontro deixaban entrever un duelo igualado, máis do que debería para as xogadoras de Maite Méndez. A escasa diferenza de puntos na táboa desdibuxouse sobre a pista, e as pontevedresas non souberon xogar ao ritmo das canarias.
No primeiro cuarto, unha forte defensa visitante tiña case inmobilizadas ás verdes, á vez que sumaban puntos baixo o aro. Aproveitando os erros do Arxil, o Magec Tías contra a violencia de xénero situábase por riba, rematando o tempo cun 14-17.
Pero a distancia das canarias non estaba facendo máis que comezar. No segundo cuarto, a inferioridade pesaba nas filas galegas, que non atopaban o seu xogo nin como compensar os puntos en contra.
Os erros eran constantes nos pases, con numerosas perdas de balón, e na falta de precisión fronte ao aro, mentres que a galega Regina Gómez sumaba sen problemas para o bando canario. Cunha renda xa de 9 puntos para o Magec chegaba o tempo de descanso.
De máis a menos
Despois da pausa, en lugar de saír concentradas e motivadas, viuse sobre a pista do CGTD a un conxunto local nervioso e desaparecido. A momentánea vitoria das visitantes pesaba demasiado e as pontevedresas non souberon reaccionar.
Así, o Magec aproveitou para facer un demoledor parcial asinando 20 puntos, soterrando as poucas esperanzas galegas. O Arxil intentouno con tiros de Natalia López e Sara Castro, pero aínda que conseguiu reducir distancias, a vitoria quedaba xa moi lonxe.
Chegados os últimos dez minutos, o único que tiveron que facer as canarias foi setenciar o partido. Os puntos de Noelia Masiá para as locais no cuarto final non serviron para forzar un posible tempo extra, xa que a intensidade das visitantes derrotaba ás galegas (55-80).
Co segundo encontro perdido de maneira consecutiva, o Arxil aínda ten que afianzar a súa permanencia. Quedan dous partidos e dúas oportunidades por diante para conseguilo.
FICHA TÉCNICA
55) CB ARXIL: Carla Fernández (8), Margarita Moreira (6), Heather Forster (7), Natalia López (7) e Sara Castro (4). – quinteto inicial -. Tamén xogaron: Noelia Masia (18), Samra Omerbasic (5) e Cristina Díaz (-).
80) MAGEC TÍAS CONTRA LA VIOLENCIA DE GÉNERO: Bea Torres (-), María Romero (6), Aina Martín (6), Nicole Murugarren (16) e Ije Uchendu (2) – quinteto inicial -. Tamén xogaron: Aitana Vergara (2), Sara Ortega (7), Aina Lewis (-), Emma Karamovic (16) e Laura Chahrour (13).
PARCIAIS: 14-17, 12-18, 14-22 e 15-23
ÁRBITROS: Escariz e Martínez.
INCIDENCIAS: Partido correspondente á 24ª xornada da LF2 disputado no pavillón do CGTD.
