Tras unha derrota na que foi a primeira saída de Galicia do CB Arxil contra o Extremadura Miralvalle Plasencia, as galegas queren reencontrarse coa vitoria. Este sábado, 21 de novembro ás 19:30 horas, as pontevedresas reciben no pavillón CGDT (Estadio de la Juventud) ao Vega Lagunera Adareva Tenerife para a oitava xornada.
As xogadoras de Maite Méndez teñen claro a importancia dunha vitoria fronte ao Adareva Tenerife, para recuperarse da derrota por case 20 puntos en Extremadura.
O rival ao que terá que facer fronte o Arxil é un recén ascendido que logrou entrar na competición coa amplicación da categoría. Malia a falta de experiencia na Liga Feminina 2, as canarias estanse a manter na metade da táboa, tras dúas vitorias e cinco derrotas que as deixan cun total de nove puntos, un máis que as pontevedresas.
O Arxil deberá frear á máxima anotadora da categoría
As visitantes non poderán contar para esta cita co xogo da internacional en categorías inferiores Alba Peña, xa que dúas semanas atrás lesionouse no encontro contra o Baxi Ferrol. Quen si estará no terreo de xogo é Alima Dembele, máxima anotadora da competición, cunha media de 17,29 puntos por partido. As pontevedresas terán por reto frear ao seu acerto anotador.
Pola súa banda, as locais contan entre as súas filas con Sara Castro, cun promedio de 10,33 puntos por encontro e con Heather Forster, cun total de 72 puntos de valoración en seis partidos. Tamén estará María Lago, a quinta xogadora cun maior número de asistencias realizadas na Liga Feminina 2, chegando ás 17.
O encontro deberá celebrarse cun aforo reducido a 30 persoas, so poderán asistir as persoas que conseguiran entrada no sorteo que club pontevedrés realiza entre as persoas aboadas. Hai que ter tamén presente os límites de mobilidade da afección que supoñen os peches perimetrais na contorna.
O cruce entre galegas e canarias será retransmitido polo Canal FEB.
Sorteo entre as persoas socias para ir aos encontros do Arxil
