A loita pola permanencia ten acento galego e, tras finalizar a décimo sétima xornada da LF2, o CB Arxil está un pouco máis preto de lograla que o Ulla Oil Rosalía. Pontevedresas e compostelás enfrontáronse na casa das primerias cun 53-48 final.
Un resultado que levanta os ánimos para ás verdes, actualmente na décima posición a tres puntos do colista, mentres que deixa ás brancas tocadas e case afundidas, sendo duodécimas pero tamén a tres do colista.
Vaivén de ocasións para Arxil e Rosalía
O partido comezou con pouco acerto para ambos equipos, que non atopaban o aro. Pasado o ecuador do primeiro cuarto, o marcador anunciaba o 2-2, dun inicio de duelo lento e sen sorte. Nos cinco minutos seguintes o Arxil colleou a iniciativa e comezou a puntuar, levandose así o primeiro tempo cun 12-9.
Para o segundo cuarto a forte defensa das locais non evitou que o Rosalía lograse un parcial 0-5, que tivo resposta nun triple das verdes. Co paso dos minutos, as pontevedresas volvían tomar o control do partido e achegábanse máis ao aro, logrando unha vantaxe de once puntos ao descanso.
Tras o paso por vestiarios, as xogadoras dirixidas por Chiqui Barros reaccionaron e subiron a intensidade na pista. Un ritmo que as de Maite Méndez non lograban aguantar, de maneira que este terceiro tempo foi favorable para as compostelás. Os esforzos das brancas lograron poñer o empate no electrónico, para decidir o duelo entre galegas no cuarto final.
Nos últimos dez minutos, o partido pasaba dunhas mans a outras. Unha canastra de Forster e un triple de López colocaban ao Arxil con cinco puntos de vantaxe. As de Barros xa non daban coa clave para frear ás pontevedresas, que aumentaban a distancia cunha boa actuación de Cristina Díaz.
Tras un tempo morto solicitado polo adestrador visitante, o Rosalía volveu a poñer o empeño en loitar polo resultado, pero sen ser quen de poñerse a menos de catro puntos. Finalmente, o Arxil aproveitou a vantaxe lograda para non deixar escapar a vitoria (53-48).
As baixas de Bineta Ndoye, ao rescindir o seu contrato co Arxil, e de María Lago, lesionada na xornada anterior, non foron motivo suficiente para que as pontevedresas perderan ante o Rosalía.
FICHA TÉCNICA
53) CB ARXIL: Carla Fernández (12), Noelia Masía (9), Cristina Díaz (8), Heather Forster (6) e Natalia López (9) -cinco inicial-. Tamén xogaron: Violeta Crespo (-). Aldara Vázquez (-), Margarita Moreira (9) e Sara Castro (-).
48) ULLA OIL ROSALÍA: Nuria Chorén (3), Blanca Manivesa (2), Ángela González (8), Leticia Soares (14) e Nerea Liste (-) -cinco inicial-. Tamén xogaron: Ana de Matías (-), Carla García (1), Paula Rivas (-), Sara Corredoira (8), Sarai Carro (3) e Clara Riera (9).
PARCIAIS: 12-9, 16-8, 7-18 e 18-13
ÁRBITROS: Jaime Enrique Álvarez Ossorio e Martín Trasancos
INCIDENCIAS: Partido correspondente á 17ª xornada da LF2 disputado no pavillón do CGTD de Pontevedra.
