O CB Arxil está a triunfar como nunca na LF2. As pontevedresas son as primeiras clasificadas no seu grupo, no que tamén compiten outros equipos galegos como o Maristas Coruña, o AD Cortegada e o Rosalía.
A falta dunha xornada para rematar a primeira volta, que finalizará o 8 de xaneiro, as de Maite Méndez son as primeiras da competición tendo sufrido só unha derrota en 12 partidos disputados. As de verde teñen ademais un colchón de catro vitorias sobre os tres equipos que ocupan a partir do quinto posto. Os catro primeiros clasificados disputarán o play off de ascenso.
Os éxitos do Arxil
Ao longo destes meses, o Arxil apoiouse no seu filial e nas júnior, pezas clave para o éxito do club pontevedrés. Así, este conxunto é o segundo máximo anotador e o segundo mellor defensor da categoría.
No apartado anotador, as pontevedresas son o terceiro club en tiros de dous, cunha media de 43,1% de acerto e un 69,6% desde os tiros libres. Ademais, son o segundo equipo mellor valorado, só por detrás do Almería, cunha media de 67,7 puntos.
Ademais, as verdes tamén triunfan en audiencia, sendo a súa última xornada o segundo partido máis visto no Canal FEB, cunha media de 317 persoas chegando a un pico nos últimos cinco minutos de 90 persoas.
Atendendo ao seu plantel, o Arxil pode presumir de contar coa serbia Dunja Buzadzin, unha das xogadoras máis determinantes da división. Unha das súas actuacións máis destacadas tivo lugar na undécima xornada, no partido que enfrontaba ás pontevedresas contra o Unicaja. Neste duelo, Buzadzin asinou 34 puntos e 5/8 triplos, converténdose na MVP da xornada.
Así van o Maristas, o Cortegada e o Rosalía
A representación galega na LF2 exténdese a outros tres equipos: o Maristas Coruña, que actualmente é o oitavo clasificado, o Cortegada, na décima posición, e o Rosalía, na undécima.
As herculinas levan un balance de seis vitorias por seis derrotas, sumando 18 puntos na clasificación. As xogadoras de Esther Muñiz contan cunhas estatísticas dun 48,8% de acerto desde os tiros de dous, un 23,4% na liña de tres e un 61,2% nos tiros libres.
Entre as súas xogadoras contan coa terceira máxima anotadora, Griffin, quen leva unha media de 16,67 puntos por partido, empatada con Buzadzin, do Arxil. Paloma Dorda é a segunda mellor tiradora do Maristas, cun promedio de 10,83 punto por encontro.
Pola súa banda, o Cortegada, décimo clasificado, só leva 4 partidos gañador polas 8 derrotas que suma. Nestas 12 xornadas, as galegas destacaron desde o tiro libre, cun 64,2% de acerto, e nas asistencias, apartado no que suman 132 nesta tempada. Nos tiros de campo, a súa porcentaxe está no 37,8%.
No individual, Sara Gómez está entre as xogadoras mellor valoradas da LF2, sendo quinta nesta clasificación, cunha media de valoración de 16,5 puntos por partido. Mercy Ayitso Wanyama e Tereza Sedlakova tamén están entre as mellores baloncestistas, con 13,42 e 10,83 puntos de promedio.
Por último, o Rosalía Fedesa non está a atravesar un bo momento deportivo, sendo xunto co colista o que acumula máis derrotas consecutivas: seis. As compostelás empatan co Cortegada en vitorias e derrotas, e polo tanto en puntos, sumando 16.
As brancas teñen unha media de acerto nos tiros de campo do 32,1%, e do 60,9% nos tiros libres. A súa máxima anotadora é Catherine Traer, con 107 puntos, e é tamén a mellor valorada, cunha media de 9,56 por partido.
