A falta de tres xornadas para que finalice a tempada na LF2, o CB Arxil non ten asegurada a súa permanencia. A derrota consumada visitando ao HGB Ausarta Barakaldo (68-60) fai que as pontevedresas teñan que agardar para festexar a salvación.
Este duelo xa se presentaba como unha proba dura para as verdes, que se enfrontaron ante un equipo que está acomodado na zona morna da clasificación. Coa vitoria do Barakaldo, o Arxil baixa á décima posición, quedando a dous puntos do posto de descenso.
O Arxil non aproveitou o acerto de Sara Castro
O equipo dirixido por Maite Méndez saltou á pista desconectado, bloqueado nas xogadas de ataque, que compensaron cunha defensa que evitaba que as locais se fóran no marcador.
Nas filas verdes, Sara Castro erixiuse como a líder, levando o peso do seu conxunto co seu acerto anotador. Un triplo e varios tiros libres permitían que a galega engadise oito puntos, dos 12 que sumaron ao final do primeiro cuarto, ao marcador. Cun 10-12 finalizaba o primeiro tempo.
No segundo o bastón de mando cambiou de mans, cun Arxil loitador, pero inferior ao Barakaldo. Cun parcial 10-0 e aproveitando os erros defensivos das rivais, as vascas situábanse á cabeza, ante un conxunto pontevedrés que non acertaba cos rebotes defensivos. Antes de chegar ao descanso as galegas reviviron, reducindo distancias pero continuando por debaixo (30-26).
Despois da pausa e o paso por vestiarios, o CB Arxil saltou á pista con ganas de remontar o duelo. As verdes mantiveron a raia ás locais, que seguían por diante, pero a poucos puntos de distancia. Maite Méndez parou o tempo para reorganizar ás xogadoras, pero as súas indicacións non permitiron a reacción pontevedresa.
O último cuarto chegou con todo por decidir, co marcador no 43-41. O CB Arxil comezou a acusar unha falta de concentración e cansancio, que se transformou en erros defensivos que permitiron que o Barakaldo se distanciara. Un triplo de Karamovic e cinco puntos de Ortega poñían ás locais a dez de vantaxe.
De novo, Sara Castro (MVP do seu equipo con 28 créditos valorativos e autora de case a metade da anotación das verdes) devolveu a esperanza ás visitantes, que seguían loitando por alcanzar ás vascas. Pero calquera esperanza galega disipouse cun parcial 10-5 a falta de dous minutos para o final, que deixou o electrónico no 68-60.
FICHA TÉCNICA
68) HGB AUSARTA BARAKALDO: Bea Torres (-), María Romero (6), Aina Martín (6), Nicole Murugarren (16) e Ije Uchendu (2) – quinteto inicial -. Tamén xogaron: Aitana Vergara (2), Sara Ortega (7), Aina Lewis (-), Emma Karamovic (16) e Laura Chahrour (13).
60) CB ARXIL: Carla Fernández (5), Sara Castro (27), Cristina Diaz-Pache (4), Natalia López (6) e Heather Forster (6) – quinteto inicial -. Tamén xogaron: Noelia Masiá (6), Samra Omerbasic (4) e Margarita Moreira (2).
PARCIAIS: 10-12, 20-14, 13-15 e 25-19
ÁRBITROS: Fuentes e Barradas. Eliminaron á xogadora local Aina Martín e á visitante Natalia López.
INCIDENCIAS: Partido correspondente á 23ª xornada da LF2 disputado no polideportivo de Lasesarre – Barakaldo (Vizcaia).
