O CB Arxil preparou a última xornada da Liga Feminina 2 coa tranquilidade de estar salvado e co factor casa ao seu favor. Porén, recibiron a un rival complicado, coa segunda posición en xogo, o Osés Construcción Ardoi. Finalmente, as navarras impuxeron o seu xogo e leváronse os dous puntos da vitoria no Centro Galego de Tecnificación Deportiva CGTD de Pontevedra por un 45-64.
O conxunto verde intentou a remontada ao longo de todo o partido, pero non chegou a superar ás visitantes en ningún momento. Como guinda final da tempada, as xogadoras do Arxil quixeron homenaxear á súa capitá, María Lago, que segue lesionada.
Ver esta publicación en Instagram
O Arxil igualou forzas co Ardoi na primeira parte
O encontro desta volta non foi tan igualado como o da ida, que rematou nun axustado 75-72. Porén, as locais loitaron duramente, sobre todo na primeira metade do partido, onde foron a remolque do Osés Construcción Ardoi no marcador electrónico e pisándolle os talóns.
Os acertos en ataque compensaban os erros en defensa do Club Baloncesto Arxil, que mantiña ás visitantes a raia no primeiro cuarto do partido. O marcador informaba do 11-12 despois dos primeiros dez minutos de encontro disputados.
No segundo cuarto, a tónica foi similar, pero as navarras comezaban a desmarcarse das galegas, conscientes do que tiñan en xogo. Un parcial 2-9 nos primeiros intres deste cuarto acendía as alarmas nas pontevedresas, que reaccionaron da man de Forster e Castro. As galegas conseguiron reducir as distancias a un tiro de campo, pero tres faltas consecutivas do Club Baloncesto Arxil permitían que o Osés Construcción Ardoi tomara de novo a iniciativa. A pausa chegou co 20-27 no electrónico.
Dominio visitante tras o descanso
Despois do paso por vestiarios viuse na pista do CGTD a un Club Baloncesto Arxil concentrado. As verdes conseguían rozar o empate coas visitantes, recortando distancias ata poñerse a un triplo, pero pouco durou a alegría en casa.
O conxunto que adestra a entrenadora Maite Méndez desfíxose ante o talento do Osés Construcción Ardoi, que foi quen de facer un parcial 0-10 que desequilibraba a balanza. A adestradora local viuse obrigada a parar o cronómetro para enmendar o partido. Así e todo o tempo morto no tivo o froito desexado. As deportistas navarras xa meteran unha marcha máis cas galegas para levarse os dous puntos en xogo no CGTD nesta última xornada.
O último cuarto chegou co 29-45 no marcador e só serviu para certificar a vitoria visitante. O Club Baloncesto Arxil seguía loitando pola remontada, pero o Osés Construcción Ardoi fixo gala da súa posición de prata e aproveitou a distancia conseguida nos cuartos anteriores para certificar o trunfo neste. O 45-64 final fai que as pontevedresas despidan a tempada con derrota, pero salvadas.
Ánimos e sorpresa para a lesionada María Lago
A xornada de despedida aproveitouna o grupo de xogadoras e corpo técnico do CB Arxil para enviarlle folgos a María Lago, que está convalecente dunha lesión, e á que lle deron unha sorpresa na pista. Velaí o detalle que tiveron coa compañeira:
💚💚O dia que despedimos a tempada quixemos darlle unha sorpresa a @MariaLagoG desexandolle forza e ánimo pra que volva ó 100% a tempada que ven.#FAMILIAVERDE #estaestugrada #somosclube #FGB #LF2 #COMPETICIONESFEB pic.twitter.com/b2heFbs9gg
— CB Arxil (@ArxilCb) March 28, 2021
FICHA TÉCNICA
45) CLUB BALONCESTO ARXIL: Fernández (8), Masia (6), Díaz (10), Forster (15) e López (1) – quinteto inicial -. Tamén xogaron: Crespo (-), Vázquez (-), Omerbasic (2), Casalderrey (-), Moreira (-) e Castro (3).
64) OSÉS CONSTRUCCIÓN ARDOI: Cabrera (6), Montero (11), Arregui (3), Navarro (2), De Barros (13) – quinteto inicial -. Tamén xogaron: Marcos (3), Cases (12), Echeverría (10), Ayela (4) e Vázquez (-).
PARCIAIS: 11-12, 11-16, 7-17 e 16-19
ÁRBITROS: Colexiados Álvarez Rodríguez e Velasco Sánchez.
INCIDENCIAS: Partido correspondente á 26ª xornada da Liga Feminina 2 disputado na cancha do Centro Galego de Tecnificación Deportiva (CGTD) de Pontevedra.
