A tempada complícase para o CB Arxil. Coa derrota ante o Extremadura Miralvalle Plasencia (49-60) desta pasada fin de semana xa son tres os partidos que perde consecutivamente e que o deixan na penúltima posición da LF2.
Malia loitar contra un dos mellores equipos da categoría, e incluso ser superiores no último tempo, o xogo verde non foi suficiente para frear ao conxunto revelación.
Con este resultado, as opcións de permanencia para o Club Baloncesto Arxil non desaparecen, pero si afastanse un pouco máis. O cadro adestrado pola entrenadora Maite Méndez debe reaccionar nas xornadas restantes para poder salvar o seu concurso o curso próximo na categoría de prata.
O CB Arxil recuperou á súa capitá, pero non a vitoria
O partido, celebrado no pavillón do Centro Galego de Tecnificación Deportiva (CGTD) de Pontevedra, comezou de maneira moi igualada. No bando local volvía a estar María Lago, e as galegas foron autoras dos primeiros puntos, cos tiros libres de Noelia Masía. Pero o Miralvalle, sen ganas nin intención algunha de se quedar atrás no luminoso, respondeu ao xogo das galegas con varias canastras que as situaban por diante no marcador.
De novo, as verdes colocáronse por riba das rivais no marcador e, de novo, grazas ao acerto anotador de Masiá desde a liña exterior. Porén, as visitantes seguían presionando con Aghayere e arrebatábanlle ás galegas o mando.
Así finalizaba o primeiro cuarto, cun intento frustrado de Sara Castro desde o triple e despois un tiro de dous, que deixaba o 15-16 no marcador.
Para o segundo cuarto, o Extremadura Miralvalle Plasencia tomou o control do encontro. Coa súa forte defensa inmobilizaron por completo ao CB Arxil, á vez que non fallaban baixo o aro. Un parcial 0-9 aumentaba as distnacias respecto ás galegas, obrigando á adestradora do conxunto local, Maite Méndez, a solicitar un tempo morto para recompoñer as filas galegas.
As instruccións da adestradora pontevedresa deron os seus froitos e foron quen de reactivar ás súas xogadoras, que saíron de novo á pista con forza e acerto, especialmente de Heather Forster e Carla Fernández. O resultado foi que o CB Arxil puido ir recurtando distancias co seu rival (22-29).
As galegas avistaban a remontada, pero o Extremadura Miralvalle Plasencia encargouse de que non fora así. Robertson seguiu anotando para o cadro visitante, desmarcándoo máis no luminoso. O descanso chegaría co 22-34.
A pausa non lle fixo ningún favor ás locais, que saíron desenchufadas á cancha. Un parcial 6-11 non facía máis que reducir as opcións da vitoria verde, que non atopaba a fórmula para encestar. O CB Arxil perdía 28-47 cando Heather Forster e Noelia Masiá encargáronse de facer un parcial 7-0 que espertaba ás locais, pero aínda estaban lonxe do empate.
O último cuarto do partido chegou cun 35-50 en contra para as galegas. Porén, non se renderon e déronno todo neste tempo, apostando polo posible trunfo.
Este foi o único cuarto do encontro no que as verdes foron superiores ao Extremadura Miralvalle Plasencia, que xa asegurara nos tempos anteriores unha vantaxe que o CB Arxil non podería superar. A eficacia anotadora das pontevedresas poñía o 45-53 no luminoso a falta de catro minutos para o final, pero as visitantes non fallaron e remataron o partido no 49-60.
Podes revivir o partido neste resumo:
FICHA TÉCNICA
49) CB ARXIL: Carla Fernández (6), Noelia Masía (10), Cristina Díaz (4), Heather Forster (8), Natalia López (3) – quinteto inicial -. Tamén xogaron: María Lago (-), Sara Castro (7), Samra Omerbasic (10) e Margarita Moreira (1).
60) EXTREMADURA MIRALVALLE PLASENCIA: Ainsa (2), Robertson (16), Morales (9), Weledji (17), Aghayere (14) – quinteto inicial -. Tamén xogaron: Cueva (2), Pizarro (-), Rodríguez (-) e Chagas (-).
PARCIAIS: 15-16, 7-18, 13-16 e 14-10
ÁRBITROS: Marchiano e Martínez.
INCIDENCIAS: Partido correspondente á 20ª xornada da LF2 disputado no polideportivo Centro Galego de Tecnificación Deportiva (CGTD) de Pontevedra.
