O CB Arxil ten un reto moi esixente por diante para esta nova xornada: competir ante o Azkoitia Azpeitia, un dos mellores equipos da categoría. O partido será o domingo, 28 de febreiro, ás 12:00 horas no pavillón do CGTD de Pontevedra.
Non será fácil para as verdes facer fronte a estas duras visitantes. O conxunto vasco ocupa a terceira posición da táboa da LF2, con 15 vitorias e só cinco derrotas.
Un balance case inverso leva o CB Arxil, que en 21 partidos acumula seis vitorias e 15 derrotas. Porén, o seu último duelo rematou en vitoria. Gañar ao Vega Lagunera Adareva Tenerife é un soplo de enerxía para un cadro que se xoga a permanencia.
Maite Méndez: ” (O Azpeitia) é un equipo cun quinteto de gran potencial”
Con todo, a concentración debe ser máxima para xogar contra o Azpeitia. A adestradora das pontevedresas, Maite Méndez, declara que “é un equipo cun quinteto de gran potencial, con tres estranxeiras de primeiro nivel, ademais de nacionais como Lizarazu e Iparagirre, que ten experiencia en Liga 1“. En palabras da técnica, as visitantes contan cun dos cinco inicial máis potentes da categoría.
Méndez, adestradora do Arxil: “O Azpeitia non pode xogar liberado en ataque”
Pola súa parte, o Arxil deberá buscar unha vía de escape dos postos que perigan por descender confiando na súa gran defensa. Segundo a súa adestradora, a chave está en que “elas non poidan xogar liberadas en ataque, porque lles gusta moito o xogo rápido, con moito un contra un, no que se sinten cómodas. Por iso é moi importante traballar a defensa do equipo”.
Como punto a favor, as pontevedresas deberán aproveitar o cansancio acumulado das vascas, que o día anterior xogan contra o Celta Zorka Recalvi.
O aforo para acudir a este encontro será de 60 afeccionados, pero poderá seguirse vía streaming no Canal FEB.
