O Arenal Emevé vén de presentar o programa ‘Becas Galicia Voley‘, apoiado polo Grupo Lence e Abeiro. Con esta iniciativa, o club lucense traballa na captación de talento, con xogadoras co ensino secundario xa finalizado e que queiran continuar os seus estudos de bacharelato ou universidade.
No acto de presentación, a presidenta Bibi Bouza explicou que “buscamos evitar que as mozas teñan que abandoar a práctica deste deporte. Queremos que o volei de elite e o desenvolvemento persoal das deportistas deixen de ser incompatibles”.
Ata tres deportistas do Emevé beneficiaranse da primeira edición deste proxecto, que se basea no modelo americano de becas deportivas, incentivando a formación académica das participantes. A lucense Carla Hernández, a boirense Lidia Figuera e a dominicana Massiel Matos recibirán o apoio do club e as entidades colaboradoras para poder impulsar ao mesmo tempo a súa carreira deportiva e os estudos.
Á presentación, ademais da presidenta e as xogadoras, tamén acudiu a conselleira delegada do Grupo Lence, Carmen Lence, quen sinalou a importancia de poder garantir que as deportistas dean continuidade á súa traxectoria académica: “Cada vez esíxesenos unha maior formación e á vez é complicado vivir dos deportes minoritarios. Estou moi orgullosa de que poidamos axuar a que estas mulleres teñan un plan b para o seu futuro”.
Reparto de tarefas no novo programa do Emevé
As participacións no programa, segundo apuntan desde o club, terán un seguimento por parte de especialistas do club en todas as materias. Como coordinadora da dirección académica, a presidenta do Emevé Bibi Bouza, docente cunha dilatada experiencia, asumirá directamente o papel de titora das estudantes.
A vicepresidenta, Antonia Iglesias, daralle apoio na xestión de recursos humanos. A dirección técnica recaerá nos dous adestradores dos equipos de Super Liga: Diego Taboada supervisará a evolución técnico-táctica, mentres que José Valle encargarase dos progresos na parcela físico-técnica. As tarefas de seguimento e captación de futuras aspirantes será responsabilidade de Jorge Bustos.
