O Viaxes Amarelle competía nesta fin de semana ante o colista, o Xaloc Alacant, que porén conseguiu igualar ás galegas. O partido rematou nun empate 1-1. Con pouco en xogo, o encontro estivo completamente equilibrado, con escasas ocasións en ambas porterías e unhas táboas xustas á fin do duelo.
As futbolistas coruñesas afrontaban a última saída da competición regular visitando a cancha do pechacancelas, Xaloc Alacant FS, e conseguía salvar un punto tras empatar a un tanto nun partido moi descafeinado e sen que ningún dos dous equipos conseguise gozar das suficientes ocasións como para levar o tres puntos, a pesar de que as galegas o tentaron os últimos minutos co xogo de cinco.
Un frouxo Amarelle rabuña un punto
Nos primeiros compases do encontro ambos equipos alternaban a posesión de balón, sen chegar a crear ocasións claras de gol. A defensa do Xaloc Alacant contiña ás herculinas, que intentaban anotar con disparos de media distancia.
O Viaxes Amarelle FSF quería ter o balón e xerar xogo contra a portaría local, mentres que o Xaloc Alacant FS esperaba en cancha propia para tentar sorprender á contra, coa súa velocidade, e porse por diante.
Pola súa parte, as locais foron aumentando a súa presión ata lograr anotar na meta do Viaxes Amarelle cando o descanso estaba a piques de chegar. Os minutos pasaban e ningún dos dous equipos conseguía pór o necesario para adiantarse no partido; pero a falta de doce segundos para o tempo de asueto, Ortiz engancha unha volea, á saída dun saque de banda, e sobe o 1-0 ao marcador, para Xaloc Alacant FS.
Despois do descanso, o Amarelle deixou claro que non ía deixarse vencer e tan só segundos despois da reanudación puxo o empate no marcador. As herculinas saían con ganas de tentar igualar a contenda. Aos trinta segundos de xogo, conseguía pór o 1-1 tras unha xogada de saque de curruncho, que finalizaba Patri Corral no segundo pau, a pase de María Gómez.
Tras este gol inicial, o equipo galego parecía que empezaba a dominar un pouco máis e querer pelexar polo tres puntos, aínda que non gozaba da fortuna suficiente. Mentres que o Xaloc Alacant FS seguía tratando de sorprender á contra, pero sen conseguir finalizar ningunha xogada co perigo necesario.
Os minutos seguían restando no crono e o resultado permanecía no 1-1. Foi nese momento cando o adestrador do conxunto herculino, Jorge Basanta, deu en apostar polo xogo de cinco. Foi nos últimos dous minutos de partido e, a pesar de que tivo un par de ocasións claras dentro da área, foron ben atalladas pola meta local, e o partido chegou á súa conclusión en táboas.
Último partido do Amarelle na casa recibindo ao Intersala Zaragoza FSF
Tras a disputa deste novo encontro da competición regular, o conxunto do Viaxes Amarelle FSF retomará os adestramentos o vindeiro martes, para preparar a última xornada da competición regular.
O próximo fin de semana disputará o último partido da tempada, como local, na Primeira División Nacional Feminina de Fútbol sala. O cadro herculino disputará a décima xornada do subgrupo D, o sábado 12 de xuño de 2021 ás 18:30 horas no Pavillón Municipal de Sagrada Familia da Coruña recibindo ás futbolistas do conxunto do Bodegas Sommos Intersala Zaragoza FSF.
FICHA TÉCNICA
XALOC ALACANT: Toñi, Angy, Lara, Póveda, Tere (cinco inicial). Tamén xogaron, Ortiz, More, Elena, Marín, Maite, Ortola, Alicia, Vero e Lorena.
VIAXES AMARELLE: Sandra Rodríguez, Anna Escribano, Patri Romaní, Tana, Sofía (cinco inicial). Tamén xogaron, Lau Doce, Patri Corral, Yaiza e María Gómez.
GOLES: 1-0, min. 20 Ortiz; 1-1, min. 21 Patri Corral.
ARBITRAXE: Alberto Miñano Martínez e Óscar Ropero Lara do Colexio de Árbitros de Alicante. Mesa: Lancelot Valera Alfocea tamén do Colexio de Árbitros de Alicante. Recibiron cartón amarelo Ortolá e Lorena no Xaloc Alacant FS e Tana, Yaiza, Patri Corral e Anna Escribano do Viaxes Amarelle FSF.
INCIDENCIAS: Partido correspondente á novena xornada da segunda fase do grupo D celebrado no pavillón Pitiu Roche de Alicante.
