O Viaxes Amarelle ten un duelo importantísimo por diante, cun partido a recuperar que pode supoñer un paso adiante cara a salvación directa na Primera División. As coruñesas intentarán eludir o descenso directo nesta xornada aprazada, puntuando ante o AD Sala Zaragoza. A cita terá lugar no polideportivo municipal Río Ebro (Zaragoza) este sábado, 29 de maio, ás 20:00 horas.
Despois de vencer na pasada fin de semana ao Universidad de Alicante, equipo invicto nesta segunda fase ata ese momento, as galegas chegan a este novo partido cargadas de enerxía.
O rival das herculinas
Para este encontro adiado, o contrincante do club galego é o AD Sala Zaragoza, un equipo pensado para loitar polo play off ao título a comezos de tempada, pero que tivo que conformarse con salvar a categoría.
Actualmente suma 58 goles a favor e 32 en contra, cun balance de 10 vitorias, dous empates e dez derrotas nos 22 partidos disputados. En total, acumulan 32 puntos e un coeficiente do 1,454.
O conxunto maño, salvado desde hai varias xornadas, só aspira a ser o subcampión do grupo polo descenso. Nesta segunda volta da segunda fase, as zaragozanas só disputaron un duelo, e caeron por un 3-0 ante o Gran Canaria FSF Teldeportivo.
O partido contra o Amarelle é o primeiro tras o confinamento, o que aumentará a ansIa competitiva das mañas.
Un Amarelle tocado, pero loitador
O conxunto dirixido por Jorge Basanta ten unha oportunidade de ouro para alonxarse do descenso e manterse con vida na loita pola permanencia. O cadro herculino xa sabe o que é sufrir na cancha, e tras xogar na última xornada contra o líder do grupo, esta semana repite convocatoria.
Cris Lourés e Candela Soria seguen a ser baixa polas súas escordaduras nos nocellos, unidas á baixa de longa duración de Martita, aínda en proceso de recuperación da operación do ligamento cruzado anterior.
A convocatoria de Basanta queda da seguinte forma:
- Leti Rojo
- Sandra Rodríguez
- Tami Gándara
- María Gómez
- Patri Corral
- Patri Romaní
- Yaiza
- Sofía
- Anna Escribano
- Lau Doce
- Tana Florentín
O equipo galego iniciará este mesmo venres a viaxe a Zaragoza e durmirá en La Rioja. O sábado rematara o camiño para disputar o encontro e regresará de novo á Coruña.
Este encontro será o primeiro das herculinas que non se poderá seguir en directo. Nin o club local nin ningún medio maño retransmiten vía streaming ou na televisión os partidos desta segunda fase da Primera División.
