O Viaxes Amarelle FSF recibe en casa esta fin de semana ao intratable Futsi Atlético Navalcarnero. As coruñesas deberán facer fronte a un equipo que leva tres anos sen perder un encontro ligueiro o próximo sábado, 6 de marzo, ás 18:00 horas.
As futbolistas dirixidas por Jorge Basanta xogarán como locais no pavillón municipal da Sagrada Familia, con toda a ilusión de poder competir a un rival desta altura. Aspirantes e favoritos a facerse co título de Liga na Primeira División de futsal, o Futsi Atlético porá as cousas moi difíciles ás coruñesas.
Distancia na clasificación
As madrileñas aínda non coñecen a derrota e ocupan actualmente a primeira posición do Grupo A, con 61 goles a favor e só 13 en contra. Nas súas once vitorias e dous empates, o cadro visitante suma 35 puntos. Ademais, chega de dúas goleadas a dous galegos: un 9-0 contra o Cidade de As Burgas e un 4-1 contra o Ourense Envialia.
Pola súa parte, o Amarelle FSF está na sétima posición, con dez puntos en trece partidos disputados, mantendo distancia co penúltimo, a catro puntos, e o colista, a seis. Empatadas a puntos están as xogadoras do Penya Esplugues.
Este encontro poderá seguirse vía streaming a través do Youtube do Amarelle.
A convocatoria do Amarelle
O Amarelle chega a este encontro con oito xogadoras de pista e tres porteiras:
- Sandra Rodríguez
- Tami Gándara
- Leti Rojo
- Anna Escribano
- Laura Doce
- Candela Soria
- Cris Lourés
- Patri Corral
- María Gómez
- Yaiza Otero
- Sofía Rodríguez
Porén, pode ser que Basanta finalmente non poida dispoñer de Cris Lourés, que se atopa entre algodóns por molestias nun xemelgo durante a última semana no partido ante o Teldeportivo.
