Este venres, o club do Viaxes Amarelle vén de emitir un comunicado facendo público o seu descontento coa Real Federación Española de Fútbol (RFEF), debido á Fase de Promoción que deberán disputar proximamente.
“Esta directiva considera unha falta de respecto ao noso deporte, que por parte dos seus dirixentes non se ten en conta e provoca situacións límite para entidades que loitan por competir baixo as súas normativas”, declaran desde o Viaxes Amarelle.
Nesta atípica tempada marcada pola COVID-19, as bases da competición foron modificadas na metade do curso, e agora, “chegada a finalización da competición” volven a sufrir cambios, “modificando datas das fases de ascenso e fases de promoción, alterando de igual modo o seu formato; pois pasa de ser nun mesmo fin de semana ambas fases en sede única a disputarse en dous fines de semana diferentes”.
O propio Viaxes Amarelle explica que “desde que o noso club sabe que terá que participar na Fase de Promoción, dirixiu consultas emails ao Comité Nacional de Fútbol Sala; e hoxe, a falta de oito días para a súa disputa, aínda non temos ningunha comunicación oficial ao seu respecto, e na mañá de hoxe, a propia RFEF publicou na súa páxina web que a Fase de Ascenso a Primera RFEF Futsal Femenina disputarase o sábado 12 de xuño en Elche, alterando por tanto as datas establecidas nas bases da competición”.
O comunicado segue especificando que “a nosa entidade tivo coñecemento a través das redes sociais o pasado fin de semana estes cambios; e é polo tanto que o mesmo domingo, 6 de xuño, presentou unha reclamación ao Comité de Competición; e o mércores 9 de xuño volveu presentar unha solicitude de medidas urxentes, para evitar que se vulnere e adultere unha competición nacional, a cal ten consideración de PROFESIONALIZADA”.
Finalmente, o escrito do Viaxes Amarelle sinala como a venres, 11 de xuño, o club aínda non recibiu “ningún tipo de resposta ás nosas demandas, nin información sobre a Fase de Promoción”.
O Amarelle pide respecto para o fútbol sala feminino
Todo isto fai que o equipo decidira emitir dito comunicado, “para que de forma notoria e pública se coñeza o atropelo que está sufrindo o noso club; e será intención da nosa entidade defender as bases dunha competición na que se invertiu moito traballo, esforzo, e como non, diñeiro para poder competir; e que isto poida servir para que por parte da RFEF se empece a respectar o noso deporte, o fútbol sala feminino”.
