O Viaxes Amarelle iniciaba esta xornada a segunda volta do Grupo D de Primeira División pola permanencia. As coruñesas aínda non teñen a salvación asegurada, e caeron derrotadas ante o Rayo Majadahonda nun igualadísimo partido que se resolveu con tres tantos no último minuto (1-2).
O equipo de Jorge Basanta buscou estender o seu bo momento (precisamente as madrileñas foron vítimas das galegas hai unha semana), pero o resultado non foi o esperado. Ante a falta de goles as coruñesas apostaron polo xogo de cinco nos últimos minutos o que, en lugar de marcar o camiño á vitoria, supuxo unha derrota nos intres finais.
Partido marcado pola igualdade
O encontro comezou cun Amarelle que quería dominar o tempo de xogo. Para logralo, decantouse por unha presión moi alta sobre o rival, dando pé a roubos de balón e ocasións creadas nas contras das herculinas. As de Basanta puideron adiantarse no marcador, sendo superior na súa propia pista, pero o Rayo Majadahonda mantíñase como un forte infranqueable.
Co comezo da segunda metade, o Amarelle continuou cunha dinámica similar, con ocasións para puntuar pero sen chegar a transformalas. Pola súa banda, as majariegas tamén tiveron varias oportunidades de anotar, xerando perigo coas súas xogadas. A medida que os minutos pasaban o marcador mantíñase inamobible.
Os puntos decidíronse no último momento
O encontro seguía sen goles, e Jorge Basanta decidiu arriscarse e apostar polo xogo de cinco loitando polos tres puntos. As herculinas comezaron cunha boa circulación, xestionando incluso unha longa, pero sen chegar a meterse no partido. A falta de menos de dous minutos, Lauri blocou o balón e saca en longo creando unha contra. A falta de porteira nas galegas pasoulles factura e Chili puido marcar a pracer para adiantar ás visitantes.
O duelo estaba xa case rematado, pero as xogadoras locais seguiron loitando por puntuar. O Rayo Majadahonda non ía deixar escapar a oportunidade de sumar os tres puntos e nos últimos segundos anotou graazas a Carmen, quen finalizaba dentro da área un saque de esquina visitante, poñendo o 0-2.
Lonxe de renderse, as futbolistas do Viaxes Amarelle FSF déronno todo nos intres finais, apostando por rascar puntos ao rival. Seguindo co xogo de cinco Yaiza puido finalmente anotar para as galegas, cun 1-2 no electrónico. O seu disparo de 12 metros axustando ao pao foi o único premio das coruñesas. O tempo esgotábase e con el as posibilidades de remontada. A falta de 47 segundos as locais seguiron presionando para forzar un empate que xa nunca chegaría.
Despois do resultado desta xornada, o Amarelle regresará ás sesións de traballo o próximo luns. Na vindeira fin de semana as de Basanta terán unha nova oportunidade para achegarse á permanencia na Primeira División. O cadro coruñés visitará na sétima xornada ao AD Sala Zaragoza no Complejo Deportivo Municipal Siglo XXI. A cita será o domingo ás 12:00 horas.
Revive o partido aquí:
FICHA TÉCNICA
VIAXES AMARELLE: Leti Rojo, Lau Doce, Candela Soria, Yaiza, Patri Corral (cinco inicial). Tamén xogaron: Patri Romaní, Anna Escribano, Cris Lourés, Sofía e Tana.
RAYO MAJADAHONDA: Lauri, Pitu, Coral, Pitxi, Moni (cinco inicial). Tamén xogaron: Cels, Vero, Marta, Chili e Carmen.
GOLES: 0-1 Chili (min. 38); 0-2 Carmen (min. 39); 1-2 Yaiza (min. 39).
ARBITRAXE: Diego Gallo Suárez e Rubén Hevia Campa do Colegio de Árbitros de Asturias. Mesa: Verónica Laura Fernández Vega do Colegio de Árbitros de Asturias. Sacáronlle tarxeta amarela a Candela Soria e Leti Rojo do Viaxes Amarelle FSF.
INCIDENCIAS: Partido correspondente á sexta xornada do Subgrupo D da Primera División Nacional Femenina de Fútbol Sala disputado o sábado 8 de maio de 2021 no pavillón municipal de Sagrada Familia (A Coruña) entre o Viaxes Amarelle FSF e o Rayo Majadahonda Afar 4 FSF.
