Coa fin da tempada 2020/2021 para o Durán Maquinaria Ensino remata tamén o paso do técnico Carlos Cantero polo club lucense. O adestrador estivo tres tempadas á fronte do primeiro equipo e deixa ás galegas asentadas na LF Endesa.
Neste período, o técnico madrileño disputou co Ensino dúas edicións da Copa da Raíña e un play off polo título, no presente curso, no que foron eliminadas esta semana polo Valencia Basket. Esta tempada as lucenses rematan en sétima posición, con 15 vitorias e 15 derrotas.
O Ensino despídese da tempada loitando ante o Valencia (82-54)
As palabras de Carlos Cantero
No seu perfil na rede social de Twitter, Carlos Cantero emitiu unha mensaxe de despedida ao club. “Hoxe remata unha etapa da miña vida como adestrador de baloncesto do Ensino, unha etapa bonita, exitosa e desas que se recordan con cariño”, comeza.
No escrito, o madrileño expresa o seu agradecemento a distintas persoas do Ensino, como á directiva e persoal do equipo, á súa familia, e afección (“moitas gracias á afección do Ensino, especialmente aos de Lugo. Grazas polo apoio no Pazo. As mostras de apoio foron enormes hacia o equipo”).
Tamén tivo palabras para a prensa, entre ela As Nosas, “que seguiron a traxectoria do equipo. Grazas polo apoio, o respecto e o cariño mostrado”.
Por último, o técnico acórdase das que xa serán as súas ex xogadoras: “O seu esforzo, profesionalidade e calidade facían que calquera sacrificio pagara a pena. Espero que elas se leven tanto de min como eu delas”.
Gracias Lugo! @EnsinoLugoCB ❤️ pic.twitter.com/bar8U6LwUt
— carlos cantero (@carloscantero_9) April 17, 2021
Un paso polo club cheo de éxitos
Desde a súa chegada ao Ensino en febreiro do 2019, Carlos Cantero foi clave nos éxitos deportivos do club lucense. O seu primeiro papel foi de segundo adestrador, para pasar a ser a cabeza do corpo técnico en outubro do mesmo ano, tras a marcha de Juan Nécega.
Á fin da súa carreira en Lugo, o adestrador dirixiu máis de 50 partidos, cun balance de 25 vitorias, sendo as máis destacadas a conseguida ante o Perfumerías Avenida na tempada 2019/2020 e contra SPAR Citylift Girona no mesmo curso.
Máis aló da puntuación, outro dos éxitos de Cantero foi o debut de seis xogadoras júnior na máxima categoría, a Liga Feminina 1, e mantendo de forma habitual a xogadoras da canteiras nas súas sesións de traballo.
O agradecemento do Ensino
Tras o seu paso polo equipo, o Ensino quere agradecer a Carlos Cantero “a súa dedicación e profesionalidade e desexámoslle de corazón todas as sortes no seu próximo destino”.
Nun escrito, o club lucense subliña as dificultades vividas nesta tempada por mor da COVID-19, e apuntan que “sen a predisposición e colaboración de Cantero, tería sido aínda máis difícil completar a tempada”.
O propio Ensino remata afirmando: “En Lugo terás as portas abertas, no Ensino sempre terás a túa casa. GRAZAS”.
Cantero: “Tiña un ano máis de contrato e a miña idea era continuar”
