Non houbo sorte para o Aceites Abril na súa visita ao Universidad de Valladolid. As galegas sufriron a que é a súa primeira derrota da Primeira División Feminina de voleibol contra un equipo local que foi superior en todos os sets.
O encontro comezou moi igualado, cun Universidad mantendo o pulso ao segundo da categoría. As xogadoras do Aceites Abril, lideradas polos saques da capitana Gladys Giráldez, lograban manter un empate no marcador 20:20. Pero varios erros consecutivos das ourensás decantaron o set do lado local.
O Universidad mantivo moi alto o ritmo e, cun xogo cada vez máis efectivo, non daba tregua ás visitantes. Raquel Palma por parte das vallisoletanas asinou un moi bo encontro xogando dunha maneira moi segura e efectiva durante todo o encontro. As xogadoras máis xoves do equipo visitante tampouco foron quen de remontar o xogo das rivais, que terminou cun 3-0.
As galegas do Aceites Abril terán a próxima cita para defender a súa segunda posición o domingo, 22 de novembro, fronte ao CD Voleibol Astillero ás 11:30 horas.
