A longa viaxe que tivo que afrontar o Aceites Abril CVO ata Cantabria pagou a pena. As ourensás venceron 1-3 ante o Voleibol Astillero.
Os reforzos e melloras das cántabras, que loitan por non descender, non foron suficientes para facer fronte a un duro Aceites Abril. As xogadoras ourensás saltaban á cancha coa vitoria como obxectivo e sendo conscientes da importancia de sumar os tres puntos.
Ao longo do duelo, o conxunto visitante demostrou a súa superioridade nos dous primeiros sets, destacando polo seu bo saque e defensa á vez que intelixencia ofensiva. Uns factores claves que se verían refrexados no marcador, que lles daba dous sets a favor.
Para a terceira manga, o cadro local subía de nivel e poñía contra as cordas ao Aceites Abril, conseguindo asinar unha importante vantaxe na parte inicial do xogo. Finalmente, esta transformouse na consecución do set para as cántabras, poñendo o electrónico no 1-2.
Chegado o cuarto tempo, a igualdade era máxima sobre a cancha, poñendo en perigo os intereses das ourensás. Porén, o conxunto galego foi quen de recompoñerse e volver á senda dos primeiros parciais. Esta reacción chegou a tempo, e o Aceites Abril volveu a retomar a vantaxe que lle daría a vitoria final 1-3.
Desta forma, o club de Ourense ocupa agora a segunda posición, con 21 puntos obtidos en 11 vitorias (nove de tres puntos e dúas dun). Trece puntos por riba está o líder, o CV Oviedo.
