O parón de Nadal rematou para o Aceites Abril CVO. A Primera División Femenina de voleibol reactívase e as ourensás visitarán a AD La Curtidora para xogar o sábado, 16 de xaneiro, ás 17:30 horas.
Xa no ecuador da competición regular, as galegas do Aceites Abril atópanse na metade da táboa. Con seis vitorias e tres derrotas, as galegas ocupan a quinta posición con 17 puntos, dous por debaixo do seu próximo rival, que está na terceira posición.
A categoría de bronce está moi competida, e cada partido conta. Por iso, as xogadoras do club de volei ourensán deberán dalo todo para levarse os puntos da vitoria, o que as situaría un paso máis preto da loita polo ascenso.
As galegas non poderán baixar a garda neste duelo, no que se enfrontarán ao conxunto máis anotador da categoría. Previsiblemente, a tónica do partido sexa a igualdade constante, con oportunidades para ambos conxuntos, que levan un balance similar.
As asturianas levan 23 sets a favor por 14 en contra, mentres que as ourensás do Aceites Abril levan 19 a favor e 11 en contra.
