Ourense foi o escenario na fin da tempada da fase de ascenso a Superliga Feminina 2 co Aceites Abril como equipo anfitrión. As galegas xogábanse un dos dous postos para competir na categoría de prata, pero finalmente quedaron na sexta posición da fase de promoción. As ourensás caeron ante o Nevadis Albolote Granada na loita polo quinto e sexto posto, por un 3-0.
Os esforzos do Voley Ourense non foron suficientes e terán que agardar polo menos unha tempada máis para cumprir o soño do ascenso. “Chegar ata aquí é un premio para todas”, aseguraba a capitá Gladys Giráldez, tras o último partido do Aceites Abril.
O esforzo do debut do Aceites Abril pasou factura
O cadro ourensán perdeu na xornda do venres ante o Badajoz, nun partido moi rifado que tivo que decidirse no quinto set. A emoción do debut das ourensás na fase de ascenso ante a súa afección puido sentirse na bancada de O Pompeo. Porén, as locais non lle brindaron a vitoria ao seu público. Ambos equipos alternáronse nos sets, frozando un tie break que foi para as extremeñas.
No seguinte partido, ante o CN Sabadell, puidose ver a un Aceites Abril moi diferente. As xogadoras arrastraron o cansancio do esforzo realizado ante o Badajoz, e non foron quen de opoñer resistencia ás catalás. Malia levarse o primeiro set, este partido rematou nun 1-3, o que eliminaba calquera posibilidade de ascenso das ourensás.
Así, o Aceites Abril só podía competir xa polo quinto posto, pero tampouco no terceiro partido houbo sorte. O rival neste encontro foi o Albolote Granada, ao cal as galegas non puideron superar en ningún set. A participación na fase de ascenso para o Voley Ourense rematou nun 3-0.
Pablo Pérez e Gladys Giráldez valoran a participación ourensá
“Malia o resultado, que pode parecer negativo, para nada o é. Estamos loitando con equipos dunha calidade increible, nós non rematamos de atopar o noso xogo en ningún momento, só no primeiro partido tivemos rachas de facer o que viñamos facendo e iso pasou factura o resto do torneo”, valorou Pablo Pérez, adestrador do club ourensán.
O técnico explica que o cansancio foi superior ás xogadoras, pero aínda así se pode facer unha valoración positiva. “O mellor de todo é que nos levamos un premio esta tempada que non contabamos con el, que era poder participar nunha fase destas e facelo en Ourense, iso chéanos de orgullo e está todo máis que perfecto”, engade.
Pablo Pérez: “O mellor de todo é que nos levamos un premio esta tempada que non contabamos con el, que era poder participar nunha fase destas e facelo en Ourense, iso chéanos de orgullo e está todo máis que perfecto”
Pola súa banda, a capitá Gladys Giráldez mostrouse orgullosa do seu equipo e coincide coa análise do adestrador, sinalando que o “partidazo” da xornada do venres agotou as pilas das xogadoras. Porén, tamén prefire quedarse co bo e recorda que “ninguén contaba con chegar ata aquí a principios de tempada”. A capitá ourensá recoñece que lle sorprendeu “para ben” o nivel do resto de equipos aos que non coñecía.
De cara á seguinte tempada, Giráldez considera que o núcleo do grupo manterase e o obxectivo será “seguir en Primeira e ver se conseguimos a fase de ascenso, se non é aquí onde sexa, pero meternos entre os dous primeiros como este ano”.
Pablo Pérez coincide subliñando que para chegar ata esta meta é necesario reforzar os adestramentos. “Hai que traballalo moito, traballar a cabeza moito sobre todo e seguir avanzando”, remata.
O DSV Sant Cugat e o CD Badajoz, novos equipos de Superliga 2
Finalmente os vencedores deste torneo e equipos ascendidos á Superliga Feminina 2 foron o DSV Sant Cugat e o CD Badajoz. O primeiro deles pasou á final tras vencer 3-0 ao CN Sabadell, mentres que o segundo o fixo gañando co mesmo resultado ao CV Oviedo.
No partido final, a vitoria foi para as catalás, que venceron cun contundente 3-0 e proclamáronse campioas da fase de ascenso celebrada en Ourense.
