O 9.º Repsol Eco Rallye A Coruña chega á súa novena edición formando parte da Bridgestone FIA EcoRally Cup, competición organizada pola FIA e que se encadra no campionato do mundo da especialidade.
O concelleiro de Cultura e Turismo do Concello da Coruña, Gonzalo Castro, e o concelleiro de Deportes, Manuel Vázquez, presentaron esta mañá a proba, que se desenvolverá do xoves 18 ao domingo 21 e terá como punto de partida a praza de María Pita, onde se situará o parque móbil.
Os participantes iniciarán a competición este xoves 18, coa saída protocolaria de vehículos da praza de María Pita ás 20.30 horas. “Desde o Concello da Coruña buscamos que a cidade acolla grandes competicións deportivas e tamén aquelas que teñen un carácter ou características que a fan única, como é o caso. Este ecorallye supón a unión da competición deportiva e automobilística co respecto do medio ambiente”, indicou Gonzalo Castro durante a rolda de prensa.
Ver esta publicación en Instagram
Á presentación deste 9.º Repsol Eco Rallye A Coruña tamén asistiron Antonio Leira, deputado provincial, Roberto García, xefe provincial do servizo de deportes da Xunta, Joaquín Verdegay, vicepresidente da Real Federación Española de Automovilismo, Antonio Rodríguez Troitiño, presidente da Federación Galega de Automobilismo, Benjamín Muñoz, delegado territorial do noroeste de Multienergía de Repsol, e Alejandro Torres, membro da organización do Ecorallye.
O venres arrinca o 9.º Eco Rallye A Coruña
Os vehículos iniciarán o venres 19 a primeira das etapas, que os levará por un percorrido por 38 dos concellos da provincia coruñesa, récord da proba organizada pola Escudería La Coruña. Participarán un total de 50 equipos, formados por un piloto e un copiloto, o que supón un cento de participantes, dos cales un 40% serán deportistas galegos/as.
A segunda xornada de competición será o sábado 20 e está previsto que o rallye finalice ao fío das 21.00 horas. Xa o domingo 21, ás 12.00 horas, celebrarase na praza de María Pita a cerimonia de entrega de trofeos.
Esta proba é puntuable para a Bridgestone Eco Rally Cup, o Campeonato de España de Energías Alternativas (CEEA RACE) e da Iberian Eco Rally Challenge, competición que se disputa na península ibérica, e que inclúe probas tanto en España como en Portugal.
Os ecorallyes son competicións automobilísticas nas que participan vehículos eléctricos, híbridos e híbridos enchufables e nas que se valora a eficiencia na condución e a regularidade.
O obxectivo último deste tipo de competicións é promover vehículos fabricados con novas tecnoloxías, deseñados para aforrar enerxía e emitir a menor cantidade posible de CO2 e outras substancias contaminantes. Estas competicións tamén pretenden incentivar os hábitos ao volante e impulsar a condución eficiente e a mobilidade.
Ver esta publicación en Instagram
