O balonmán non para en Nadal e, por iso, a Federación Galega de Balonmán organiza co Concello de Pontedeume un All Star o próximo sábado, 26 de decembro, desde as 18:20 horas. A cita inclúe un partido mixto.
O pavillón da Casqueira será o epicentro do espectáculo das mellores xogadoras galegas de balonmán pertencentes á primeira categoría autonómica.
O All Star Mixto FGBm 2020, inspirado nos all star da NBA, será un evento benéfico co obxectivo principal é o de recaudar fondos para Cáritas Pontedeume. Ademais, tamén se busca poñer en valor as competicións autonómicas desta disciplina.
O balonmán galego despide o 2020 cun All Star ao puro estilo NBA o día 26 de decembro en Pontedeume!https://t.co/mKqiU5jztw
— Federación Galega Balonmán (@fgabalonman) December 21, 2020
Unha xornada de concursos de balonmán
O evento comezará ás 18:30 horas do 26 de decembro e incluirá varias probas. A primeira delas será un concurso de lanzamento, seguido dun de habilidades e un de sete metros, no que formarán parte os participantes.
A xornada rematará ás 20:00 horas, co All Star Mixto como colofón. Nel participará un representante de cada equipo de todos os conxuntos que forman parte da Primeira Autonómica da Federación (FGBm).
Protocolo COVID-19
Durante a presentación do evento, o vicepresidente da FGBm, Ignacio Permuy, comentaba que “somos plenamente conscientes da situación sanitaria que estamos a vivir, por iso este evento contará cun protocolo aínda máis exhaustivo ca o que estamos acostumados a aplicar semanalmente”.
Desta forma, todos os participantes, deportistas e organización realizarán un test de antíxenos o mesmo día en orixe e realizarán o desprazamento en autobuses coa distancia e precaucións recomendadas polas autoridades sanitarias. Permuy engade que, “coma ven sendo habitual, toda a actividade se levará a cabo coa máscara oficial da FGBm, ademais de realizar a desinfección pertinente en cada espazo de xeito periódico”.
O aforo será reducido, as entradas gratuítas e a reserva das mesmas realizaranse vía online, a través da App de control de aforos da empresa galega Cluber, simplemente premendo nunha ligazón e introducindo os datos básicos para acceder á instalación.
Desde a organización da Federación e o Concello de Pontedeume, solicitan que as persoas asistentes teñan en conta o carácter benéfico do evento, e se animen a colaborar con Cáritas coa aportación de produtos non perecedoiros, que se recollerán na entrada da instalación (produtos enlatados, envasados, produtos de hixiene persoal…, e todos entregados en bolsas).
Ademais, outra forma de colaboración é realizar donativos no número de conta de Cáritas Pontedeume (ES75 2080 0201 9030 0016 3221).
O evento poderá seguirse vía streaming a través da canle de Youtube da Federación Galega de Balonmán.
