O 2020 e a primeira volta competitiva pechanrase con outro duelo galego na Liga Feminina 2 que enfronta, na décimo terceira xornada, ao BAXI Ferrol e ao Ulla Oil Rosalía, o sábado ás 17:00 horas en A Malata.
Dous equipos con obxectivos ben distintos esta tempada: as ferrolás queren seguir invictas e subir de categoría, mentres que as compostelás loitan pola permanencia no seu debut na LF2.
O BAXI quere irse invicto ás vacacións
As locais, dirixidas por Lino López, chegan de gañar a outro galego, o Celta Zorka Recalvi, nun partido moi intenso e igualado entre dous dos mellores equipos da división. Con este partido, as ferrolás superaron a barreira dos mil puntos a favor no que vai de Liga, a falta dun partido e toda a segunda volta.
Con este partido, queren sumar outra vitoria máis ao seu casilleiro en casa e seguir así co pleno de triunfos que as manteñen na primeira posición. Para logralo, López conta cun moi bo plantel pero nas súas filas non estará Julieta Mungo.
O adestrador explicou que “sufriu un golpe no cuádriceps e xa case non puido xogar ante o Celta. É mellor que se recupere e non a imos forzar. O resto das xogadoras están ben”.
Lino López, técnico do BAXI: ” Nós imos centrarnos en mellorar o que facemos mal e tratar de conseguir unha nova vitoria”
Sobre o conxunto que terán enfronte, o técnico apuntou que “é un equipo moi móbil, que fai moitas variantes defensivas. Nós imos centrarnos en mellorar o que facemos mal e tratar de conseguir unha nova vitoria”.
O Rosalía “con ilusión”
Tamén tivo palabras para as rivais o técnico do Rosalía, que cada vez que se refire ás líderes destaca o seu altísimo nivel, no que considera “o plantel máis poderoso da Liga”. Para Chiqui Barros, o BAXI é un conxunto que “por orzamento e polo nivel das súas xogadoras estaría en Liga Feminina sen ningún tipo de apuro e competindo a bo nivel”.
Este será un partido especial para o técnico, que xoga na súa terra, así como as baloncestistas Sarai Carro e Blanca Manivesa. A cita celebrarase “nun escenario magnífico e precioso, con moita historia, como é A Malata”, segundo apunta Barros.
Chiqui Barros (adestrador do Rosalía): “Xogaremos con toda a ilusión e intentando facer o mellor baloncesto posible como estamos facendo ultimamente”
Este será o punto final a un ano “moi ilusionante e moi bonito” para as de Santiago. As compostelás son conscientes do nivel do próximo rival, polo que esta será “unha oportunidade de desfrutar un partido que moitas das nosas xogadoras non podían imaxinar hai un ano”.
A actitude coa que saltarán ao campo é “con toda a ilusión e intentando facer o mellor baloncesto posible como estamos facendo ultimamente e coa proposta de xogo que temos que esperamos ser capaces de levala o máis lonxe posible”, expresaba o adestrador.
O Rosalía ven de sumar a terceira vitoria da tempada, desta vez ante o Maristas, nun partido moi desputado, e vez máis preto o obxectivo da permanencia no seu ano do seu debut na Liga Feminina 2.
O partido disputarase ante 250 siareiras nas gradas de A Malata, o sábado, 19 de decembro, ás 17:00 horas. Quenes non poidan acudir ao pavillón, poderán seguilo a través do Canal FEB.
Tras o partido, as xogadoras de Ferrol terán unha semana de vacacións e as competidoras nacionais volverán a casa. Non o farán así as internacionais que, polos protocolos COVID-19, quedarán en Ferrol a pasar as festas de Nadal.
Este sábado concluiremos la primera vuelta peleando por la 13ª victoria consecutiva‼️ #baxiferrol #disfrutardelcamino #LF2 pic.twitter.com/nFUU8rhr7Y
— Baxi Ferrol (@UniFerrol) December 16, 2020
