A alcaldesa de Lugo, Lara Méndez, e o secretario xeral para o Deporte, José Ramón Lete Lasa, reuníronse na Escola Galega de Administración Pública para tratar a actualidade do deporte lucense. O eixe central da conversa foi a planificación dun novo polideportivo para a cidade luguesa, na que a Xunta cofinanciará o proxecto.
A incidencia da pandemia COVID-19 no deporte tamén foi un tema sobre a mesa, así como a actualidade dos clubs lucenses e a renovación do tartán das pistas de atletismo das Pedreiras.
Un novo polideportivo para Lugo
A rexidora presentou unha iniciativa para crear en Lugo un espazo deportivo polivalente, pensado para acoller a práctica de competicións de fútbol sala, baloncesto, balonmán, minibasket, voleibol, bádminton, ximnasia rítmica e outros deportes de interior. Este polideportivo seguirá os principios de eficiencia, sustentabilidade e innovación.
Este novo edificio, pensado para o barrio da Garaballa, contará ademais cun sistema de bancada retráctil e dúas bancadas laterais fixas, con aforo para 1.000 espectadores. Segundo Lara Méndez, este sistema dará versatilidade ao pavillón, “xa que, segundo a modalidade da que se trate permitirá recolocar o mobiliario para aumentar ou diminuír a súa capacidade co fin de acoller calquera tipo de evento”.
O chamado Lugo Sport Life disporá de catro vestiarios, zonas de almacenaxe, unha zona de recepción e unha de carácter social.
Desta forma, a Xunta sufragará parte dos 2.940.000 euros do orzamento estimado para facer realidade este polideportivo de 3.490,60 m2. Así mesmo, o concello de Lugo solicitará á Deputación provincial a súa colaboración económica co proxecto.
“Debe ser un traballo conxunto, co fin de incentivar a práctica deportiva – como hábito saudable e actividade de ocio – pero tamén para dar resposta ás demandas da veciñanza creando dotacións modernas, versátiles e tamén respectuosas co noso medio”, declarou a dirixente lucense.
Outro dos aspectos abordados na reunión entre Méndez e Lete Lasa foi a situación do pavillón polideportivo da OJE (Organización Xuvenil Española) para a rehabilitación e acondicionamento do edificio, do que a Xunta é cotitular.
Neste aspecto, Lete Lasa asegurou que “é importante reactivar o funcionamento dunha instalación deportiva de primeiro nivel situada no corazón do casco vello para adecuala ás necesidades dos cidadáns e ofrecer un espazo optimizado para os clubs da capital”.
