Outra xornada, e un novo golpe. O enésimo pau que encaixan as xogadoras do HC Borbolla que logo de 21 días sen partidos voltaban competir e sufrían un novo revés. Foi contra o CP Las Rozas. Estiveron preto de acadar, por fin, esos primeiros puntos que tanto precisan as herculinas. Pero, finalmente, o resultado voltou ser unha derrota (2-1). Seis partidos despois do seu retorno á elite, as galegas non logran puntuar e teñen o seu casilleiro a cero.
Trinta minutos estivo o HC Borbolla, cun resultado que lle permitía puntuar e cambiar dinámica. Do minuto 14 ao 30 incluso estivo por diante. Pero en sete minutos viu como a súa curta vantaxe diluíase e de ir gañando pola mínima pasou a ir perdendo tamén por un so tanto.
Do resultado 0-1 ao 2-1 que se puido ver no electrónico ao final do partido vai un mundo para as galegas que terían estreado o seu casilleiro de puntos. Despois de ir por diante, en sete minutos encaixaron dous goles que relegaron ás coruñesas, unha xornada máis, ao papel de perdedoras do choque. A situación frusta, pero o deporte é así non sempre golpea xustamente.
Como decíamos, as de Monte Alto acumulan seis xornadas sen puntuar, unha situación que pesa na táboa clasificatoria, na que son pechacancelas, e no ánimo das patinadoras que adestra Santi Martínez que ven como unha semana máis acariñan os puntos que logo se lles escorregan entre os dedos. As galegas aturan golpe tras golpe do destino.
O gol do HC Borbolla anotouno no minuto 12 Fernanda Muñoz. A cinco minutos do final da primeira metade, Julia Cabanas non foi quen de anotar unha pena máxima. E chegouse co 0-1 ao descanso.
Giulia Galeassi, desequilibrante, golpea desde o punto de penalti
Sabían no HC Borbolla que Giulia Galeassi era un oso duro de roer, sobre todo, en xogadas de estratexia, en faltas, ou en penaltis. Foi xustamente a internacional italiana a ‘verduga’ das de vermello e negro. Consumidos cinco minutos do segundo tempo, a trasalpina batía a Fernanda Tapia desde o punto fatídico. A porteira chilena lle tiña detido un lanzamento de penalti pero non puido co segundo.
Nas ocasións das coruñesas, apenas un minuto despois do empate 1-1, Fernanda Muñoz desaproveitaría unha falta directa. O CP Las Rozas chegou a fallar dúas faltas directas, pero as madrileñas leváronse finalmente o gato á auga cun novo gol da italiana Giulia Galeassi que colocaba o 2-1 no electrónico.
Santi Martínez: “Ninguén sabe como puidemos perder”
O adestrador das coruñesas, Santi Martínez explicaba tras do partido que o primeiro tempo “foi de absoluto dominio noso. Elas case non crearon ocasións”.
Xa na segunda metade admite que “o partido igualouse máis. Elas empazarona chegar máis a portaría e nós seguimos tendo ocasións. Algunha desas ocasións parecía máis doado marcalas que erralas”, lamenta
O técnico das de Monte Alto explica que o CP Las Rozas “empatounos de penalti e tiveron outro máis que parou Fernanda. Os dous equipos fallamos una directa”.
Santi Martínez, entrenador do HC Borbolla: ” O primeiro tempo foi de absoluto dominio noso. Elas case non crearon ocasións”
Para o preparador do HC Borbolla, o “segundo gol é deses que che sae un cada moitísimos intentanos, case á desesperada. A verdade, foi un golazo”.
Rematamos o partido con esa sensación de que ninguén sabía como foi que puidemos perder. Estamos fastidiadas, pero así é o deporte. So nos queda seguir traballando. Non hai tempo para nos lamentar. So podemos recapacitar sobre o partido”.
O partido co Alcorcón “será unha final como todos os que quedan”
A vindeira semana, o HC Borbolla afronta un partido que case é unha final. Mídense as galegas ao CP Alcorcón. Trátase dun rival directo na loita pola permanencia na elite estatal. O cruce está fixado para o día domingo 22 ás 16:30 horas.
As coruñesas xa teñen na cabeza ese cruce. “Xa estamos pensando no CP Alcorcón. Xogamos o domingo ás 16:30 horas. É outra final, como todos os partidos que teremos ata que remate a tempada”, anticipa o adestrador coruñés.