O Celta Femxa Zorka sumou a súa décima vitoria consecutiva da tempada fronte ao Domusa Tecnik ISB (74-57), aínda que o triunfo quedou marcado pola preocupación ante a posible lesión de gravidade da súa capitá, Sara Vidal.
Ver esta publicación en Instagram
Segundo recolle a crónica de Nano Ameneiro na páxina ofical do club, o Celta Femxa Zorka acadou unha vitoria importante ante o Domusa Teknik (74-57) para continuar na loita pola primeira praza clasificatoria. O partido tivo dúas fases ben diferenciadas: na primeira, o Domusa Tecnik ISB plantouse realmente ben durante o primeiro cuarto, acadando unha diferenza importante. As celestes puxéronse entón o mono de traballo e conseguiron neutralizar e darlle a volta á situación para chegar ao final do encontro cun marcador cómodo.
Cristina Cantero non puido contar de inicio con Martina Vizmanos, reservada de maneira preventiva por motivos físicos, aínda que si formou parte da rolda de quecemento. A posta en escena do conxunto visitante foi boa e, cun xogo moi coral, lograban destacarse no marcador.
Chegaron a acadar ata oito puntos de vantaxe (13-21) no primeiro parcial. Unha primeira acción importante do partido produciuse cando Skaylar Van cometeu a súa segunda falta persoal, que, acompañada dun leve xesto de desaprobación, foi sinalizada cunha falta técnica. Sen a súa americana interior (9 puntos ata ese momento), Domusa Tecnik ISB sentiuse orfo de presenza interior relevante.
O Celta Femxa Zorka xa lograra neutralizar no primeiro cuarto (18-23) o perigo vasco e o partido mantívose durante uns minutos máis baixo o dominio visitante, con acerto desde o exterior. O punto de inflexión no marcador produciuse tras un triplo da ex do Ferrol Geraldynn Leaupepe (29-33 a 5:40).
A partir de aí, as visitantes pecharon de maneira radical o seu fluxo ofensivo e quedaron bloqueadas durante máis de 15 minutos de xogo. As celestes comezaron a alternar defensas e acadaron un parcial de 12-0 que lles permitiu marchar por diante ao descanso (41-35), tal e como recolle a crónica de Nano Ameneiro na páxina ofical do club celeste.
O terceiro cuarto foi un monólogo celeste. As visitantes só lograron anotar catro tiros libres e todo o acerto da primeira metade transformouse en desacerto na segunda. Con ese panorama e cun equipo celeste arrollador, as pupilas de Cristina Cantero acadaron a máxima vantaxe do partido cando estaba a piques de pecharse o terceiro parcial (61-37). Os puntos do Domusa Tecnik ISB neste cuarto chegaron todos desde a liña de tiros libres.
Lesión de Sara Vidal
É certo que o Domusa Tecnik ISB espertou en certo modo cun mini parcial acumulado entre cuartos de 0-8, pero a falta de oito minutos produciuse a xogada desafortunada que condiciona absolutamente a crónica deste encontro. Sara Vidal recibía un pase ao contraataque e, cun mal xesto no xeonllo dereito, ía ao chan.
Segundo recolle a crónica de Nano Ameneiro na páxina ofical do club celeste a capitá celeste corre o risco de perderse o resto da tempada por unha lesión de gravidade, á espera dun diagnóstico máis preciso. O silencio apoderouse do pavillón e o partido entrou nunha nova dimensión, na que o máis importante estaba na persoa que permanecía sentada na última fila do banco.
Ver esta publicación en Instagram
Os minutos foron pasando e unha acción innecesaria de Inés Vieira acendeu ao público ao empurrar, a falta de dous minutos e cunha gran desvantaxe, a Carlota Menéndez nunha entrada a canastra. Con todo o pavillón cos nervios a flor de pel chegouse ao final do encontro, cunha clara vitoria celeste (74-57), pero coa sensación amarga no corpo de ter unha baixa en combate, a da súa referente e capitá do equipo. Tal e como indica a crónica de Nano Ameneiro.
Seguinte parada do Celta na LF Challenge, Barcelona
O Celta Femxa Zorka que adestra Cristina Cantero rematará o ano 2025 en Barcelona. A vindeira semana desprázase á pista do último da clasificación, o C.B. Santfeliuenc, para pechar o ano e gozar dunhas merecidas vacacións. Á espera do diagnóstico de Sara Vidal, o baloncesto volverá a Navia o tres de xaneiro ante o Bosonit de Logroño.
Ver esta publicación en Instagram
FICHA TÉCNICA
74) CELTA FEMXA ZORKA: Carlota Menéndez (9), Uxía Rodríguez (3), Andrea Boquete (2), Jessica Kelliher (19), Diana Cabrera (9) —cinco inicial— Deva Bermejo (11), Isabel Cabello (0), Sara Vidal (0), Jiselle Thomas (16) e Paula Salinas (5).
57) DOMUSA TEKNIK ISB: Inês Vieira (10), Sara Iparaguirre (3), Alazne Lizundia (3), Eloise Latotte (6) e Skailar Van (17) —cinco inicial— Barbora Tomancova (2), Montse Gutiérrez (3), Marta Otaegi (0), Geraldynn Leaupepe (9), Jone Azcue (4) e Cristina Villamor (0).
PARCIAIS: (18-23) (23-12) (20-4) (13-18)
EQUIPO ARBITRAL: Javier Gribal Brugada e Diego Fernández Requejo. Sinalaron 16 faltas ao Celta Femxa Zorka e 20 ao Domusa Teknik ISB.
INCIDENCIAS: partido correspondente á 12ª xornada da Liga Femenina Challenge da tempada 25/26, disputado no pavillón municipal de Navia ante 750 espectadores.
Declaracións de Cristina Cantero ao final do partido
Ver esta publicación en Instagram
