As galegas que conforman o Pontevedra Rugby Club teñen o seu segundo partido como equipo esta fin de semana. Será o seu primeiro partido fóra da casa, viaxando a Cataluña para xogar ante o GE i EG na segunda xornada da División de Honor B. O encontro será o domingo, 17 de xaneiro, ás 11:00 horas.
O inicio de Liga complicóuselle ás Irmandiñas do rugby que conforman o Pontevedra RC. Debutaron ante o Barcelona Universitari Club (BUC), un equipo de moi alto nivel, que non deu opción ás galegas, deixando o marcador nun 0-94.
A ilusión do Pontevedra RC pode coa derrota
Pero de todo se aprende, e a ilusión e paixón polo deporte oval destas xogadoras é superior ao desgaste que poida supoñer unha derrota. Por iso, para esta segunda xornada, as Irmandiñas terán a oportunidade de poñer en práctica as leccións aprendidas do estreo.
O primeiro partido tampouco foi moito máis favorable para as catalás. Tamén sumaron unha derrota, no derbi ante o CR Sant Cugat, cun 44-5 no marcador. O ensaio de Sabine Van de Graaf non foi suficiente para dar enerxía ás entón visitantes, que comezan a tempada na penúltima posición.
A última, polo de agora, a ocupan as novatas do Pontevedra, que non sumaron ningun punto no primeiro partido. Por iso, esta cita será unha nova oportunidade para crecer e mellorar como conxunto e demostrar no campo o nivel do rugby galego.