O Celta Zorka Recalvi está imparable. Xornada tras xornada, e xa van sete consecutivas, as viguesas suman unha vitoria que as achega ao seu obxectivo do ascenso. A súa última vítima foi o HGB Ausarta Barakaldo, que caeu ante as celestes por un contundente 46-76.
Con este resultado o Celta Zorka Recalvi mantense como o equipo coa segunda mellor racha da Liga Feminina 2 e ocupa a quinta posición, con 34 puntos, e sendo o conxunto con menos partidos disputados da categoría. As celestes aínda teñen que recuperar o encontro adiado ante AD Cortegada (xornada 17) e Azkoitia Azpeitia (xornada 20).
O Celta Zorka Recalvi dominou en pista allea
Ambos conxuntos chegaban con baixas notorias a este encontro. No bando local, as vizcaínas lamentaban a falta de Ijeona Uchendu, a súa máxima anotadora. No bando visitante, non estaba Noa Comesaña, baixa de última hora.
Porén, o Celta Zorka Recalvi fíxose sen problemas co control do partido xa nos primeiros minutos. As celestes non necesitaron nin cinco minutos para adiantarse e impoñerse cun contundente parcial 3-12.
A superioridade visitante, que se lucía cun xogo rápido, fixo que o técnico rival solicitarse parar o cronómetro para enderezar ás súas xogadoras. Estas responderon ben en ataque pero sen saber frear a Mariona Martín, que serviu un par de asistencias relevantes. Ao final do primeiro tempo as celestes tiñan xa unha renda de sete puntos.
Para o segundo cuarto o Celta Zorka Recalvi continuou co seu recital anotador, cun parcial 0-7 logrado en cuestión dun par de minutos. Porén, as de Cristina Cantero confiáronse e comezaron a cometer erros de relaxación con varias perdas de balón. As rivais aínda estaban lonxe de alcanzalas, pero para evitalo a adestradora viguesa pediu un tempo morto. Pararse, temporizar e pensar é as veces a mellor solución para recompoñer filas, aclarar obxectivos e volver mecanizar aspectos do xogo que temos interiorizados.
A férrea defensa celeste mantivo a flote ao equipo vigués malia os fallos en ataque, que era algo máis efectivo desde a liña exterior. Nestes minutos destacou entre as filas galegas a xogadora uruguaia Florencia Niski, autora de dous triplos que poñía o marcador no 19-33 no ecuador do partido.
Un terceiro cuarto demoledor
O encontro parecía xa moi ben encamiñado para as viguesas, pero calquera dúbida que puidera existir en Lasearre disipouse no terceiro cuarto do partido.
De novo repetiuse o esquema dun inicio de cuarto cun gran parcial visitante (0-9). O HGB Ausarta Barakaldo quedábase sen ideas para facer fronte á ofensiva celeste. A canastra de Aina Martin para o HGB Ausarta Barakaldo foi pouco en comparación cun magnífico cuarto celeste, no que destacaron Celia García, Coello, Motley e Julien.
Para o último cuarto, o electrónico xa marcaba o 32-59. Lucía Fontela sumábase á festa de anotación das galegas con dous triplos consecutivos e Cantero aproveitaba a vantaxe conseguida para facer rotacións no seu banco.
Unha vez máis, o xogo en equipo foi clave nun conxunto que reparte os seus minutos e puntos entre todas as participantes. A clave detrás deste Celta imparable que sumou outros dous puntos co 46-76 final.
FICHA TÉCNICA
46) HGB AUSARTA BARAKALDO: Laura Chahrour (7), Aina Martín (2), Aitana Vergara (7), Emma Karamovic (16), Bintou Lo (2) -cinco inicial- Eva Ortega (5), María Romero (4), Alexis Lewis (3), Beatriz Torres (0) y Nicole Murugarren (0).
76) CELTA ZORKA RECALVI: Mariona Martín (6), Celia García (14), Rose Marie Julien (11), Ángela Coello (10), Marita Davydova (6) -cinco inicial- Ainhoa Lacorzana (0), Lucía Fontela (10), Florencia Niski (6), Maja Stamenkovic (0), Clara Prieto (0) y Adrienne Motley (13).
PARCIAIS: 9-16, 10-17, 13-26 e 14-17.
ÁRBITROS: Imanol Diz Felipe e Pablo Mirantes Ibabe. Sinalaron 20 faltas ao conxunto do HGB Ausarta Barakaldo e 14 faltas ao Celta Zorka Recalvi.
INCIDENCIAS: Partido correspondiente á 21ª xornada do Grupo A da Liga Femenina 2 disputado no pavillón Lasesarre (Barakaldo).
