Os puntos non deixan de chegar ao casilleiro ferrolá. Nove partidos e nove vitorias sitúan ao Baxi Ferrol na primeira posición da Liga Feminina 2, como líder indiscutible da categoría. O último triunfo, fronte ao Ouses Construciones Fundación Navarra Baloncesto Ardoi, cun 58-68 na casa das navarras.
Neste Baxi de éxitos, o normal é que as galegas se impoñan ao rival con máis de 90 puntos ao seu favor. Así foi en seis das nove xornadas disputadas, con resultados sempre moi abultados que daban a vitoria ao equipo ferrolán, claramente superior.
O Ardoi puxo en apuros ao Baxi
Pero non foi así fronte ao Ardoi. O equipo navarro logrou frear por momentos ao líder da categoría, nun partido moi disputado. O rival desta xornada para o cadro dirixido por Lino López chegaba pisando forte desde a terceira posición. Con só unha derrota, as navarras acumulaban 13 puntos cun partido menos por disputar.
Así, o encontro correspondente á novena xornada comezou co conxunto local adiantándose no marcador, ata lograr un inquietante 10-0 en contra das ferrolás. A diferenza no electrónico aumentou a medida que pasaban os minutos e, con cinco faltas persoales entre as xogadoras de Lino López, o adestrador decidiu facer cambios no quinteto titular aos seis minutos.
A reacción non foi suficiente para remontar o resultado no primeiro cuarto, que rematou cun 22-16. No segundo parcial, as visitantes centráronse na defensa, que logrou parar o xogo navarro e que o Baxi se colocase por primeira vez por diante, no minuto 17, grazas a un triple de Patri Cabrera. Desta forma, o resultado inclinábase xa a favor das de Lino López, cun 31-39.
Tras o paso por vestiarios, o conxunto ferrolán seguiu levando a iniciativa no marcador, aínda que non estivo tan acertado no ataque, con problemas á hora de finalizar as xogadas. As locais aproveitaron os erros do seu rival e lograron un empate a falta de dez minutos de partido.
No último cuarto, as baloncestistas de Ferrol melloraron o seu xogo tanto en ataque como en defensa e adiantáronse grazas a dous triples consecutivos. Desde ese momento, o equipo mostrouse máis sólido e dominou o duelo logrando unha vitoria cunha diferenza final de dez puntos.
Por primeira vez na tempada, o resultado dun encontro do Baxi Ferrol remata cunha diferenza inferior a 34 puntos. Con todo, o bo xogo do Ardoi non bastou para vencer e, de novo, os dous puntos engadíronse ao casilleiro ferrolán.
Final del partido en Zizur Mayor. Y sí, así también da gusto ganar.
Osés Construcción @FNBardoi 58
BAXI Ferrol 68#DISFRUTARdelCAMINO #LF2 pic.twitter.com/iYST1KQCXH— Baxi Ferrol (@UniFerrol) November 29, 2020
Ademais da vitoria, o Baxi Ferrol tamén celebrou dous fitos para dúas das súas xogadoras. Con este encontro, a capitá Patri Cabrera sumou 300 partidos disputados na competición da FEB, mentres que Irene Gari chegou ao seu encontro 150º. Cabrera foi ademais a xogadora máis destacada do conxunto ferrolán, con 17 créditos de valoración, e a máxima anotadora do encontro con 21 puntos.
Seguiuna de preto Jenna Linn Allen, con 16 puntos valorativos, 10 tantos anotados e seis rebotes. Aínda así, a MVP quedou no bando local, cos 21 puntos de valoración que logrou Amaya Gastaminza, cos seus 16 tantos anotados e sete rebotes.
FICHA TÉCNICA
58) OSÉS CONSTRUCCIÓN ARDOI: María Cabrera (9), Amaya Gastaminza (16), Tamara Montero (10), Iranzu Echeverría (4), Itziar Arregui (9)- quinteto inicial – Tamén xogaron: Eva Cases (8), Alazne Vicente (-), Deborah Atelaa (2) e Andrea Tollar (-).
68) BAXI FERROL: Laura Fernández (2), Irene Gari Gilabert (7), Geraldynn Leaupepe (4), María Anniina Ijanen (2), Jenna Allen (10) – quinteto inicial – Tamén xogaron: Patricia Cabrera (21), Julieta Mungo (3), Patricia Benet (2), Natalia Rodríguez Domínguez (-), Andrea Boquete (11) e Sune Swart (6)
PARCIAIS: 22-16, 9-23, 17-7 e 10-22.
ÁRBITROS: Alejandro Benavente e Diego Núñez.
INCIDENCIAS: Partido correspondente á novena xornada da LF2 disputado no pavillón municipal Zizur Mayor, en Navarra.
