O RC Deportivo ABANCA suma unha nova renovación máis, nesta ocasión trátase da lateral esquerda Noelia Villegas. A futbolista súmase á lista de renovadas do equipo branquiazul na que tamén figuran futbolistas como: Peke, Esther Sullastres, Athenea del Castillo, Cris Martínez ou Alba Merino.
Según informaba o equipo galego, a defensa Noelia Villegas “asinou a súa renovación co RCD ABANCA por dúas tempada, até xuño de 2022. Villegas, central ou lateral esquerda de 24 anos, chegou ao equipo deportivista o pasado verán, procedente do Madrid CFF“.
Os números de Villegas
A futbolista gaditana foi unha habitual nas aliñacións do equipo branquiazul desde o inicio de tempada. Baixo as ordes de Manu Sánchez, Villegas participou en 19 dos 21 partidos que o Deportivo ABANCA disputou até o momento na súa estrea na Primeira Iberdrola, sendo titular en 17 deles.
Ademais de na competición de Liga, Noelia actuou co conxunto deportivista en ambos os dous partidos que o club galego disputou este curso no transcurso da Copa da Raíña. Nun dos casos, entrou ao campo substituíndo a Nuria. Foi no partido disputado no Estadio ABANCA-RIAZOR fronte á Valencia CF Feminino. Como titular xogaría no Estadi Johan Cruyff contra o FC Barcelona.
Pendentes doutros nomes como Tere Abelleira
Tal e como confirmaba en rolda de prensa virtual o presidente do RCD, Fernando Vidal, a entidade deportivista traballa na confección da plantilla de cara á vindeira campaña. Esta renovación é unha mostra máis de que a dirección deportiva deportivista está tentando asentar os alicerces para o curso 2020-2021 empezando por asegurar a continuidade de figuras clave do plantel.
Unha deses nomes propios no equipo que adestra Manu Sánchez é a internacional en categorías inferiores Tere Abelleira. O presidente branquiazul admitía que no caso da medio galega o equipo herculino tería feito unha oferta. Pero deixou entrever que as arcas coruñesas non poderían asumir plantexar unha oferta máis elevada.
No caso de Abelleira, fálase do presunto interese de clubs como o FC Barcelona ou CD Tacón, cuns orzamentos moi distantes do equipo da Coruña.
O presidente do RC Deportivo, Fernando Vidal, advertía tamén en rolda de prensa esta semana que o club faría valer os dereitos de formación que ostenta sobre a futbolista, dado que actualmente é unha xogadora sub 23.
