- Orzán SD e CTA da RFGF poñen en marcha unha iniciativa interesante na que as futbolistas aprenden a ser árbitras.
Non son poucas as veces que se fala do descoñecemento que as persoas que practican o fútbol ou outras disciplinas deportivas teñen do reglamento. Desde o Comité Técnico de Árbitros (CTA) da Real Federación Galega de Fútbol (RFGF) e o Orzán SD veñen de pór en marcha unha iniciativa que cualifican de “histórica” e que, sen dúbida, pode poñer fin a esa situación entre moitas futbolistas, pero é que ademais pode facer que moitas se decidan por sumarse ao colectivo arbitral.
Considerado como un referente no fútbol feminino autonómico agora o conxunto herculino do Orzán SD torna en pioneiro a nivel estatal na formación na arbitraxe. Así, o conxunto coruñés segue camiñando cara á excelencia a pasos axigantados e iniciativas como a que acaba de poñer en marcha denotan o estado de saúde do que goza a histórica entidade que preside Fernando Taboada.
A “Cidade Deportiva da Torre – Campos de Fútbol Arsenio Iglesias” da Coruña albergaron o pasado venres o acto de presentación oficial do novo convenio de colaboración entre un club de fútbol da RFGF, como é o propio Orzán SD, e o Comité Técnico Galego de Árbitros de Fútbol que preside Bernardino González.
Grazas a esta alianza, todas as xogadoras do club coruñés maiores de 13 anos realizarán o curso de acceso a árbitra de fútbol, sendo o primeiro club de fútbol feminino da historia en adoptar este acordo.
Con esta iniciativa búscase de forma valente e verdadeira apostar pola muller no mundo do fútbol, ademais de socializar, exemplificar, formar ás xogadoras e proporcionarlles de fronte ao futuro unha saída a maiores da práctica do fútbol. Ao tempo que coñecen mellor o reglamento e empatizan coa figura da árbitra.
Dúas profesoras de primeiro nivel as árbitras: Beatriz Cuesta Arribas e Eugenia Gil Soriano
Toda a formación impartida, con carácter oficial dentro deste convenio, será impartida polas colexiadas de Primeira División Eugenia Gil Soriano e Beatriz Cuesta Arribas, quen o pasado venres realizaron o primeiro adestro técnico-práctico nas instalacións da “Cidade Deportiva da Torre – Campos de Fútbol Arsenio Iglesias” .
A presentación oficial deste acordo histórico tivo lugar o pasado venres e ao mesmo acudiron o presidente da RFGF, Rafael Louzán; o presidente do CTGAF, Bernardino González; o presidente do Comité Galego de Adestradores e director da Escola, Iván Cancela; o delegado dos árbitros na Coruña, Rubén Eiriz; e o presidente do Orzán SD, Fernando Taboada.
