- Con as novas 85 incorporacións, o número total de deportistas galegos e galegas recoñecidos e recoñecidas no alto nivel segue batendo récords e chega xa a 1.712, sendo 715 mulleres (42%) e 997 homes (58%).
O Diario Oficial de Galicia vén de publicar a orde do 21 de outubro de 2025 pola que se recoñecen as persoas deportistas de alto-nivel, alto rendemento, rendemento deportivo de base e vitalicias, persoas adestradoras ou técnicas, xuízas e árbitras recoñecidas de alto nivel, e se relacionan as solicitudes desestimadas e a causa.
Arredor do 78% de todos os recoñecidos (1.328) son deportistas galegos de alto nivel (556 mulleres e 772 homes). Ademais, hai 154 deportistas de rendemento deportivo de base (75 mulleres e 79 homes); 146 deportistas de alto rendemento (61 mulleres e 85 homes); 45 técnicos de alto nivel (cinco mulleres e 40 homes); 26 árbitras e xuízas (13 mulleres e 13 homes); e 13 deportistas galegos de alto nivel vitalicios (cinco mulleres e oito homes).
Entre estes DGAN vitalicios atópanse algúns dos mellores deportistas de Galicia aos que se vén de sumar nesta convocatoria Rodrigo Germade (piragüismo). Ademais, tamén destacan Carlos Arévalo, Carlos Pérez ‘Perucho’, Teresa Portela e Cristian Toro (piragüismo), Támara Echegoyen, Nico Rodríguez e Sofía Toro (vela), Adi Iglesias (atletismo adaptado), Susana Rodríguez Gacio (paratríatlon), Chano Rodríguez (natación adaptada), Enmanuel Reyes (boxeo), Juan Antonio Saavedra (tiro paralímpico).
Cómpre salientar, asemade, que entre todas as categorías están recoñecidos 53 deportistas galegos (19 mulleres e 34 homes) con diversidade funcional, o número máis alto da historia que segue a medrar.
Estas cifras acadadas polo deporte de alto-nivel de Galicia débense por unha banda, ao traballo e ao incremento de nivel dos deportistas de Galicia nos últimos anos, así como ao novo decreto de alto nivel publicado en setembro de 2020 que, ademais do deporte de alto-nivel de Galicia, tamén recoñece o alto rendemento deportivo (práctica deportiva que aínda non pode ser cualificada de alto nivel pero cuxa proxección indica que estará en condicións de selo) e o rendemento deportivo de base (etapa de desenvolvemento e perfeccionamento previa a acadar o alto rendemento deportivo ou o alto-nivel).
O mesmo ocorre coas categorías de técnicos-adestradores e xuíces-árbitros, novos colectivos que se incorporan a figura do alto nivel, a través da Comisión Galega de Avaliación do Alto nivel deportivo.
Axudas da Xunta ao alto nivel
Cómpre salientar que, no ano 2024, as axudas da Xunta de Galicia para os deportistas, técnicos, adestradores, xuíces e árbitros de alto-nivel acadaron un novo récord ao chegar a preto de 1 millón de euros (958.120 euros), superando nun 30% ao destinado en 2023 (736.500 euros). Neste sentido, segundo informa a Xunta de Galicia os deportistas de alto-nivel acadaron un total de 8,4 millóns de euros dende 2005 en axudas.
