O Poio Pescamar non ten rival no Grupo A da Primeira División, onde xa leva seis vitorias consecutivas, catro delas desde que volveron á competición tras a corentena. A última delas, cun contundente 6-1 ante o Leganés failles merecedoras da primeria posición da táboa, liderando en solitario.
O gran nivel defensivo do conxunto vermello e sen fallos en ataque permitiron sumar outros tres puntos ao seu casilleiro, facendo un total de 31, arrebatándolle o liderado ao Futsi Atlético, agora a cinco puntos.
Liderado merecido para un Poio demoledor
O Poio Pescamar está nun gran momento de forma, e demóstrano semana tras semana. A pasada fin de semana recuperouse o encontro ante o Leganés da décima xornada, no que as galegas marcaron o ritmo desde os primeiros compases do partido.
O primeiro tanto non tardou en chegar, e o fixo da man de Ana Rivera, cunha xogada persoal aos dous minutos do inicio. Catro despois chegaría a imparable Dani Sousa, anotando tras un desvío dun lanzamento de Luci.
Pola súa parte, as visitantes intentaban facerse co control do partido, aumentando a súa intensidade e a tensión que se respiraba en A Seca. Porén, Dani Sousa de novo poñía o terceiro no marcador a favor do Poio, nun dobre penalti que encamiñaba a vitoria local.
As vermellas sentenciaron o partido na segunda metade
A segunda parte chegaría cun guion similar á primeira. Nesta ocasión, Iraia foi a encargada de anotar para as vermellas, co cuarto gol galego nun man a man na que foi a súa primeira chegada á área. O Poio non chegaba facilmente á meta rival, pero cando o facía non fallaba.
O conxunto visitante intentaba responder cun xogo de cinco, pero as galegas sentíanse cómodas en casa e no liderado, defendendo sen dificultades a meta de Caridad. A falta de 13 minutos para o final, o adestrador rival probou sorte con Puche como porteira xogadora. Ao mesmo tempo, as galegas aproveitaban para aumentar a súa posesión e a portería vacía no bando rival para sumar dous tantos máis, obra dunha Luci que facía así o seu hat trick.
O marcador xa informaba dun doloroso 6-0 para as visitantes, que seguiron loitando polo gol da honra. Este chegaría no tramo final, da man de Stone, xa no minuto 38.
O Poio Pescamar é así líder, aínda que ten dous partido xogados máis que o Futsi Atlético Navalcarnero, o seu inmediato perseguidor que ten nove partidos gañados por dez das galegas. O Poio Pescamar non volverá xogar até a fin de semana do 7 de marzo, data na que recibirá ao Ourense Envialia. Ese partido e o que xogarán unha semana despois, contra o 14 de marzo, co AE Penya Esplugues, son os partidos que lle restan por disputar nesta fase competitiva da Primeira División Feminina do fútbol sala da RFEF ás poienses.
FICHA TÉCNICA
6) POIO PESCAMAR: Caridad García; Luci, Ana Rivera, Dani Sousa e Irene García – quinteto inicial –. Tamén xogaron: Miriam, Julia Dupuy, Iraia, Antía, Agostina Chiesa, e Clara.
1) LEGANÉS FSF: Míriam, Chuli, Patry Montilla, María Barcelona e Puche – quinteto inicial –. Tamén xpgaron: Paula Molano, Guti, Stone e Pipi.
GOLES: 1-0, min. 2 Ana Rivera; 2-0, min. 6 Dani Sousa; 3-0, min. 17 Dani Sousa (d.p.); 4-0, min. 25 Iraia Arbeloa; 5-0, min. 29 Luci; 6-0, min. 30 Luci; 6-1, min. 38 Stone.
ÁRBITROS: Carreira e Darriba. Amonestaron con cartón amarelo a Clara no Poio e a Patry Montilla e Carmen Noreña no Leganés.
INCIDENCIAS: Partido correspondente á 10ª xornada da Primeira División do Fútbol Sala Feminino da Real Federación Española de Fútbol, disputado no pavillón municipal A Seca. Xogouse a porta pechada por mor das restricións de acceso de público a eventos deportivos que rixe en Galicia para dobregar a curva de contaxio da COVID-19.
