O pasado 7 e 8 de novembro celebrouse en Pilar de la Horadada (Valencia) o Torneo Internacional de Jóvenes Promesas de Loitas Olímpicas, no que as loitadoras galegas Nerea Pampín e Nerea Iglesias conseguiron tres ouros para o equipo da Federación Española.
Nerea Pampín, do clube Keltoi de Vila de Cruces, acadou un ouro na categoría Júnior en 68 kilos de peso. Unha categoría na que, en 76 kilos, tamén obtivo un ouro Iglesias, da Escuela Ayude de Santiso. Iglesias repetiu ademais no máis alto do podio na categoría Cadete.
Estas tres medallas súmanse ás acadadas polos loitadores das competicións masculinas. En total, os galegos foron premiados con nove medallas: catro ouros, catro pratas e un bronce.
Sobresaíron os deportistas David González, do clube Sabarís, cun ouro en júnior e un bronce en sub23; Santiago Sánchez de Keltoi con dobre prata, en júnior e sub23; Omar Rodríguez do centro Sabaris, cunha prata en sub23; Saúl Bello de San Ignacio con outra prata, desta vez en cadete e Manuel González, tamén do San Ignacio, cun cuarto posto en cadete.
A actuación das loitadoras foi de gran nivel, sobre todo tendo en conta as dificultades que tiveron á hora de preparar a competición polas restricións sanitarias.
Nerea Iglesias e Nerea Pampín, na concentración de Fegaloita
Despois desta competición, as integrantes da Federación galega de loita e disciplinas asociadas (Fegaloita) permaneceron concentradas no CAR Infanta Cristina de San Javier, en Murcia, o 9 e 10 de novembro para seguir coa formación das deportistas. A esta concentración, dirixida por Pablo Pintos, foron convocadas Nerea Pampín, Nerea Iglesias, Santiago Sánchez, Omar Rodríguez e Saúl Bello.
Desde Fegaloita destacan tamén a actuación dos árbitros Daniel Fernández e Jorge Garrido, ambos convocados pola Federación Española para dirixir a competición, así como a dos técnicos Rubén Méndez e Marcos Miragaya, o seleccionador nacional cadete. A seguinte gran cita será a finales de mes, no campionato de España sénior, que celebrarase en Murcia.
