Esta semana, Nerea Pampín Blanco, do Club Keltoi de Vila de Cruces, estará en Plovdiv (Bulgaria) para participar no Campionato de Europa sub23 de Loitas Olímpicas.
A deportista bolseira no CGTD de Pontevedra participará na categoría de -65 kg de Loita Feminina. Segundo aseguran desde a Federación Galega de Loita, a galega está nunha moi boa forma deportiva, e aspira a gañar combates nesta cita, como xa fixera nos campionatos de Europa júnior.
Un Campionato marcado pola guerra
Con todo, esta cita deportiva á que acude Nerea Pampín preséntase como complicada, debido ao conflito entre Rusia, Bielorrusia e Ucraína. A Federación Internacional de Loita (United World Wrestling) vetou a participación de Rusia e Bielorrusia en todas as citas internacionais e cancelou todos os eventos concedidos ás candidaturas presentadas por ambos os países.
No caso das competición de loita olímpica, estes dous países adoitan aportar deportistas moi competitivos, polo que previsiblemente o nivel deportivo desta cita baixará, abrindo á súa vez a oportunidade de vitoria para outros países.
Da mesma forma, aínda é unha incógnita o que sucederá coas deportistas rusas nacionalizadas por outros países, como é o caso de Taimurad Friev en España.
