- Con experiencia en ligas tan potentes como a italiana, a polaca ou a romanesa, Anneclaire Ter Brugge chega a Lugo tras o seu paso polo VC Zwolle de Países Baixos.
- “É unha xogadora cunha traxectoria contrastada a pesar da súa mocidade, cun físico poderoso e unha mentalidade competitiva que encaixa no noso proxecto”, sinala Andrés Hurtado
O CV Arenal Emevé incorpora ao seu primeiro equipo á internacional neerlandesa Anneclaire Ter Brugge, unha oposta de gran potencia ofensiva e ampla experiencia internacional a pesar da súa mocidade. Nada en 2002 e con 1,86 metros de altura, destaca pola súa capacidade para liderar o ataque desde segunda liña, a súa explosividad no salto e a súa potencia de golpeo, alcanzando unha altura de remate (spike) de 313 cm.
Formada inicialmente como central nos Países Baixos, Anneclaire evolucionou con rapidez cara ao posto de oposta grazas á súa agresividade en ataque, a súa habilidade co balón e a súa capacidade para asumir responsabilidades en equipos de alto nivel. Na súa traxectoria figuran pasos por algunhas das ligas máis esixentes do voleibol europeo e americano, como a Serie A1 italiana, a Tauron Liga polaca, a liga romanesa ou a liga profesional de Porto Rico, ademais de disputar competicións europeas como a Champions League e a Challenge Cup.
Durante a tempada 2023/24, militou en varios equipos internacionais de primeiro nivel: Alba Blaj en Romanía —co que disputou a Champions e conquistou a Supercopa—, Changas de Naranjito en Porto Rico, e o San Bernardo Cuneo na máxima categoría do voleibol italiano. Na campaña anterior xogou en Polonia con OnlyBio Pałac Bydgoszcz, e anteriormente no seu país con Eurosped e VC Zwolle, equipo do que procede.
Hurtado salienta de Anneclaire Ter Brugge o seu golpeo potente
“Anneclaire Ter Brugge é unha xogadora cunha traxectoria contrastada a pesar da súa mocidade, cun físico poderoso e unha mentalidade competitiva que encaixa no noso proxecto”, explica Andrés Hurtado, director de vóley do CV Arenal Emevé . “Ten unha capacidade de ataque moi alta, cun golpeo potente e bos recursos técnicos. Ademais, achéganos esa mestura entre experiencia internacional e fame de seguir crecendo nunha contorna esixente como a liga Iberdrola”.
Desde o club valórase especialmente a súa adaptación a distintas culturas deportivas e a súa capacidade para render en contextos de alta esixencia. “Chega co reto de afrontar a súa primeira experiencia en España e de converterse nunha peza importante dentro do equipo. Por perfil, encaixa no que buscamos: unha oposta potente, sólida en ataque, con percorrido e personalidade na pista”, conclúe Hurtado.
Anneclaire Ter Brugge convértese así na segunda fichaxe anunciada polo CV Arenal Emevé para a tempada 2025/26, tras a incorporación da internacional española Amelia Porteiro. Ambas estarán ás ordes de Alberto Chaparro, novo técnico do equipo lucense para a sexta tempada consecutiva do equipo na liga Iberdola.
