O Club Ciclista Riazor, a través de Paraciclismo Galicia, vén de facer pública a fichaxe de Natalia Vitoria Sifre. Desde a entidade ciclista coruñesa denominan a súa chegada como a “conexión valenciana”, dado que se trata dunha corredora orixinaria desa comunidade autónoma.
A tetraciclista é campioa de España e, din desde o seu novo clu: “Unha das corredoras máis amables da competición”. Destacan que a nova incorporación ao club galego “comparte os mesmos valores no deporte” que o club ao que se suma.
A nova handbiker do Club Ciclista Riazor militaba no C.D. TetraSport co que competía no ámbito estatal e internacional na categoría WH2.
Así se despedía Natalia Vitoria Sifre do seu ex club
A finais do ano pasado a ciclista anunciaba, xusto logo de gañar o campionato de España, que esa sería a súa última competición co Club Deportivo Tetrasport. A deportista tiña boas palabras para o seu ex equipo do que dicía que se levaba “os comezos, onde me din conta que podía ir en bici. De aí ás carreiras populares, na 10k de Valencia, no 2015 comezou todo… Logo chegaron moitísmos quilómetros máis con toda a xente do Tetrasport. E provocados por un imparable Luis Doramas”.
A paracilista Natalia Vitoria Sifre explica que “as veces, a vida nos obriga a decidir cousas que non nos gustan, pero que sabes que fai falta facelas… Marcho contenta, cunha medalla para o que sempre, sempre e sempre será o meu club”.
A publicación da deportista valenciá remataba cunha pregunta ao aire que xa ten resposta: “A ver que depara o futuro…”. Polo momento, o presente a coloca defendendo o maillot do Club Ciclista Riazor.
