Narón será de novo o epicentro do fútbol sala feminino galego o próximo sábado 10 de abril coa disputa da gran final da XIV Copa Galicia correspondente á tempada 2019/2020 entre o Pescados Rubén Burela FS e o gañador da semifinal que enfrontará ao Poio Pescamar e ao Ourense Envialia. O horario da gran final aínda está por determinar.
Tal e como informa a Federación Galega de Fútbol, a batalla polo título autonómico terá como escenario o Pavillón da Gándara, que xa albergou o pasado mes de xaneiro a final da cita masculina entre o Pescados Rubén Burela e o Noia Portus Apostoli que acabou coa vitoria do elenco da Mariña.
A competición está organizada pola RFGF en colaboración co Concello de Narón e cos clubs Cidade de Narón e S.D.C. e R. Narón o Freixo.
As Guerreiras Laranxas agardan rival para a Copa Galicia
O Pescados Rubén Burela vén de ser recoñecido recentemente como o mellor club feminino do mundo e esta campaña volve aspirar absolutamente a todo.
As Guerreiras Laranxas chegan a esta final correspondente á tempada 19/20 despois de eliminar na súa semifinal ao Viaxes Amarelle FSF, outro dos nosos representantes na máxima categoría do fútbol sala feminino nacional.
O rival do Pescados Rubén Burela nesta gran final da XIV Copa Galicia de Fútbol Sala sairá da outra semifinal que enfronta ao Poio Pescamar e ao Ourense Envialia, outros dous dos nosos na máxima categoría do fútbol sala feminino estatal.
O encontro de volta da devandita eliminatoria terá lugar o próximo 23 de marzo ás 20:00 horas e promete fortes emocións, posto o partido de ida que tivo lugar en Poio rematou cun empate sen goles