Só quedan cinco días para desfrutar da final da XIV Copa Galicia. O Concello de Narón presentou oficialmente o duelo polo título este luns, no que se enfrontarán Pescados Rubén Burela e Ourense Envialia. O partido entre dous equipos da Primeira División do futsal será este sábado, 15 de maio, ás 17:00 horas (TVG).
O pavillón da Gándara acollerá esta finalísima da Copa Galicia, un “orgullo” para o consistorio de Narón en palabras da súa alcaldesa, Marián Ferreiro. A rexidora recalcou a aposta da cidade polo deporte e as categorías femininas en particular.
Pola súa parte, o vicepresidente da Real Federación de Fútbol Galego (Futgal), Pablo Prieto, agradeceu a implicación do concello: “Narón é ocmo a nosa casa e queremos destacar a súa axenda e tamén a do Cidade de Narón e do Narón-O Freixo pola súa boa disposición e colaboración cada vez que organizamos algún evento”. O delegado federativo, Abraham Yáñez, engadiu que “para min como naronés, é un orgullo contar con ese vínculo permanente do Concello e dos clubs de Narón”.
Durante o acto de presentación desta nova edición da Copa Galicia, Ferreiro e o concelleiro de Deportes, José Oreona, subliñaron a implicación dos clubs Cidade de Narón e o Narón – O Freixo e a colaboración do Centro de Recursos Solidarios de Narón.
Na cerimonia tamén estiveron presentes o delegado local do Colexio Galego de Árbitros de Fútbol Sala, Juan Manuel Díaz. En representación dos clubs, acudiron Almudena Fariña e Rafael Pazos dos equipos naroneses, dúas xogadoras do Burela e o Envialia e unha árbitra.
Venda de entradas para a final da Copa Galicia
Xa están á venda as entradas para a final da XIV Copa Galicia entre o Burela e o Envialia. O prezo das mesmas é de 10 euros para os adultos e de 5 euros para os menores ata 14 anos. A reserva das entradas realizarase previamente ata completar o aforo máximo permiitdo polas autoridades.
Para reservalas é necesario enviar un correo electrónico co nome, apelidos, DNI e teléfono de contacto a ofreixonnaron@ymail.com e o día do duelo poderanse recoller as entradas no despacho de billetes. Para calquer consulta se pode contactar co 606 695 253.
