As nadadoras galegas logran 12 podios no VIII Campionato España CCAA

Galicia tomaba parte esta fin de semana no Campionato de España de Comunidades Autónomas de Natación para as categorías Infantil e Júnior. A cita deportiva tivo lugar en Las Palmas de Gran Canaria e contou con catro sesións, repartidas entre o venres pola tarde e o domingo pola mañá. En total, as deportistas galegas subiron en doce ocasións ao podio. Ata tres desa ducia foron no máis alto do podio.

As nadadoras infantís galegas conseguiron rematar coma bloque na cuarta posición. O triunfo correspondeu a Islas Baleares, seguida de Andalucía e Comunidad Valenciana

Polo que atinxe ás nadadoras galegas junior, competiron a moi bo nivel, acadando o quinto posto conxunto, por detrás da comunidade vencedora, Cataluña, á que seguiron: Madrid, Comunidad Valenciana e Andalucía

Na clasificacións conxunta das dúas categorías e ambos xéneros, a Selección Galega obtivo un quinto posto final no VIII Campionato de España por CC.AA. júnior e infantil, por detrás de Cataluña, Madrid, Valencia e Andalucía. Tanto a Selección de categoría infantil como a de categoría júnior acadaron o sexto posto final.

Así se repartiron os podios galegos

Ao máis alto do caixón lograron subirse a infantil Carla Carrón, nos 200m libres, e a junior Paula Otero, que gañou nas distancias de 800m libres e 100m bolboreta. Carla acadaba ademais un segundo lugar nos 50m libres e nos 400m libres.

VIII Campionato de España de Comunidades Autónomas / CNA

Pola súa parte, Paula Otero, do Club Natación Arteixo, acadou tamén medalla nos 400m estilos, onde foi segunda, e nos 200m estilos onde foi terceira. Ademais destas distancias, nadou os 800 libre, 200 bolboreta, e as tres remudas da súa categoría. Esta nadadora fixo dúas marcas persoais moi destacadas. Na proba de 800 libre (8.46.23) nadou por debaixo da mínima esixida para participar no Campionato de Europa Junior, marca que deberá refrendar no Open de Sabadell para ser válida. Tamén batiu dúas Mellores Marcas Galegas de 16 anos, na proba de 200 bolboreta, con un tempo de 2.16.83 e na proba de 200 libre na primeira posta da remuda, con un tempo de 2.03.71.

As outras deportistas galegas que acadaron medalla foron: Alicia Bouzas que fixo prata nos 800m libres infantís, e bronce nos 200m estilos, bronce e nos 400m estilos. No caso da tamén infantil Julia Rodríguez, falamos dunha prata nos 100 bolboreta, e un bronce nos 200 bolboreta.

Batéronse Mellores Marcas galegas

No plano individual hai que destacar a Mellor Marca Galega de 16 anos batida por Ana Cernadas en 100 costas na primeira posta da remuda 4×100 estilos júnior cunha marca de 1:05.98. Esta mesma nadadora bateu a Mellor Marca Galega de 16 anos en 200 costas con 2:22.68. No caso de Paula Otero bateu dúas Mellores Marcas Galegas de 16 anos batidas en 200 bolboreta con 2:16.83, proba na que foi primeira júnior, e en 200 libre na primeira posta da remuda 4×200 libre con 2:03.71.