A tempada 2021/2022 trae unha novidade ao baloncesto español. A FEB vén de crear unha nova categoría, a chamada LF Challenge, unha liga intermedia que se sitúa entre a LF Endesa e a LF2. Esta división estará formada por 16 equipos, os dous descendidos da máxima categoría e os 14 ascendidos da ata agora segunda categoría. O Celta Zorka Recalvi será o único representante galego nesta liga.
O presidente da entidade española, Jorge Garbajosa, declarou que a LF Challenge “serve como exemplo da nosa fortaleza e da puxanza do baloncesto feminino que a próxima tempada teremos unha nova división, a Liga Challenge que demandaba a competición e que vén a igualar as tres competicións que ten o baloncesto masculino”.
O formato da LF Challenge
Con 16 contrincantes loitando por dous prazas de ascenso, unha das principais transformacións desta categoría inferior á LF Endesa está no único grupo a nivel estatal. Así, tal e como indican desde o Celta Zorka Recalvi, a LF Challenge supón un salto de calidade respecto ao sistema anterior e terá maior repercusión e visibilidade respecto á LF2.
En total, disputaranse 30 xornadas na liga regular, que dará comezo o próximo 25 de setembro. Á fin da competición ascenderá directamente o primeiro clasificado, e posteriormente xogarase un play off de ascenso a ida e volta. Os clasificados ente o segundo e o noveno posto poderán optar á outra praza de ascenso, nunha fase que rematará cun Final Four para decretar ao vencedor desta posicion na elite.
O calendario
A liga regular desta nova LF Challenge comezará a finais do mes de setembro, concretamente o día 25. Posteriormente xogaranse as eliminatorias de cuartos, entre o 17 e o 23 de abril. Finalmente, o Final Four terá lugar entre o 30 de abril e o 1 de maio.
Que pasará cos outros equipos galegos da segunda división?
Os outros clubs galegos que competiron na xa rematada campaña da 2020/2021 na LF2, a excepción do BAXI Ferrol que logrou o ascenso, manteranse na categoría. CB Arxil, AD Cortegada, Maristas Coruña e Ulla Oil Rosalía competirán cun novo formato.
A Liga Feminina 2 terá dous grupos de 14 equipos dos cales poderán ascender dous, pero descenderán de categoría seis. Os catro primeiros clasificados de cada grupos xogarán a Fase Final, que outorga os dous postos de promoción á LF Challenge.
Esta liga regular iniciarase o 2 de outubro e rematará o 9 de abril. Entre o 21 e o 24 de abril xogarase a Fase Final.
