- A xogadora, procedente do Arona Tenerife Sur, logrou co equipo da súa localidade o subcampeonato de Copa e un terceiro posto na liga Iberdrola na tempada 17-18
O CV Arenal Emevé pecha o seu cuarteto de centrais coa incorporación de Na Ebi Obi. Con esta contratación o club lucense incorpora ás súas filas a unha das xogadoras máis cobizadas da Superliga 2 e referente no seu posto na categoría.
“Coñecemos a Naebi ben porque nos enfrontamos moitas veces a ela e estou seguro de que vai loitar cada semana para entrar no sexto inicial. Iso vainos a facer moito máis competitivas” confesa o adestrador do CV Arenal Emevé, José Valle.
A dirección deportiva do CV Arenal Emevé xa ten os deberes feitos no capítulo de incorporación de centrais para o seu equipo feminino. A chegada de Na Ebi Obi pecha o cuarteto de xogadoras para esa posición co que contará José Valle, formado por Inés Rivas, Inma Lavado, Darlevis Mosquera e a propia Obi.
A pesar da súa mocidade Na Ebi xa ten experiencia na máxima categoría onde tivo un papel destacado na tempada 17-18, campaña na que o Arona Tenerife Sur logrou a terceira praza na liga Iberdrola e alzouse co subcampeonato na Copa. No seu palmarés tamén conta cun campionato na Superliga 2 na tempada 16-17, curso no que tamén sumou unha medalla de prata en Copa Princesa.
Esta será a segunda experiencia de Na Ebi Obi lonxe de Canarias despois do seu periplo na campaña 18-19 en Mairena Vóley. Toda a vida ligada ao club da súa localidade, no que tamén xogan as súas irmás Ikwuowma, Naike e o seu irmán Ikemba, a segunda dos irmáns Obi buscará demostrar que está chamada a protagonizar grandes momentos dentro do Vóley nacional.
José Valle: “”Coñecemos a Na Ebi, enfrontámonos moitas veces a ela”
Este feito é algo que non dubida o seu novo adestrador, José Vale, que destaca ademais o seu espírito de superación: “Coñecemos a Na Ebi Obi ben porque nos enfrontamos moitas veces a ela e estou seguro de que vai loitar cada semana para entrar no sexto inicial. Iso vainos a facer moito máis competitivas”, afirma o preparador de Abadín.
Na Ebi Obi convértese no quinto reforzo das Loitadoras tras Yael Castiglione, Jimena Fernández Gayoso, Eliana González e Darlevis Mosquera. Estas incorporacións, sumadas ás renovacións de Inma Lavado, Sara Urrea, Julia Paradela, Inés Rivas, Marta Otero, Lida Figueira, Ainara Burgo e Carolina Camiño, fan que as lucenses conten xa con 13 fichas confirmadas das que comporán o persoal o próximo curso.
