O Museo da RFEF réndese aos éxitos do fútbol feminino. A forza do fútbol feminino é unha realidade e esta década (2011-2020) foi realmente dourada grazas a presenza de galegas como Vero Boquete ou Mari Paz Vilas. De feito, a xogadora de Santiago de Compostela formou parte da selección que gañou o Campionato Europeo Feminino Sub-19 da UEFA en 2004.
A xogadora de Vilagarcía, Mari Paz ten o récord de goles nun partido coa Selección Española no que anotou a friorenta cifra de 7 tantos nun mesmo encontro. Ademais, a actual xogadora che xogou varios clasificatorios, o Europeo Absoluto e a Cyprus Cup que logrou levantar coa Roja.
España posúe unha das mellores canteiras como testemuñan as seleccións Sub-16, Sub-17 e Sub-19, o que desemboca e explica que a Absoluta de Jorge Vilda estea a brillar con luz propia en Mundiais, como o de Francia 2019, e en torneos do prestixio e categoría da SheBelieves Cup.
De feito, moitas das xogadoras que entre 2010 e 2018 conquistaron tantos títulos agora son parte da columna vertebral do bloque que conformaron Vilda. Ese equipo acabou segundo na SheBelieves de 2020 tras gañar a Xapón e Inglaterra e perder pola mínima ante EEUU, que foi, ao cabo, campión.
Os numerosos títulos conquistados entre a Sub-17 (1 Mundial e 4 Eurocopas), a Sub-19 (3 Eurocopas) e a Absoluta (1 Algarve Cup) abriron de pao a pao as portas do Museo da Selección ao fútbol feminino.
Gran papel no pasado Mundial
De todos estes éxitos destaca a presenza nas vitrinas do Museo da Copa do Mundo Sub-17 do ano 2019 e os recordos do gran papel completado por España no último Campionato Mundial de Francia 2019 a pesar da notable ausencia da galega Vero Boquete.
Uruguai foi o escenario que contemplou o triunfo da Sub-17: tras realizar un magnifico torneo, a selección derrotou a México na final (2-1), no estadio Charrúa de Montevideo, e converteuse no primeiro combinado feminino español en proclamarse campión do mundo.
Un museo que agarda máis éxitos
Se as máis novas brillaron, as maiores doutoráronse no Campionato do Mundo de 2019. Foi o da consagración de España como unha das actuais potencias mundiais: o equipo de Vilda non só conseguiu clasificarse senón que, por primeira vez na súa historia, superou a primeira fase mundialista -a de grupos- e caeu en oitavos dando a cara e xogando de ti a ti á gran potencia que é Estados Unidos.
Todos estes éxitos non son senón o principio dunha carreira de triunfos que o Museo agarda para ter nas súas vitrinas.
